Ջնջումներ՝ քննչական գործողությունների արձանագրություններում

«Երևանի Գեղարվեստի պետական ակադեմիա» ՊՈԱԿ-ի պատասխանատու անձանց կողմից առանձնապես խոշոր չափերի կաշառք ստանալու գործի գրավոր նյութերում, մասնավորապես, քննչական  գործողությունների արձանագրություններում շատ են ամսաթվի կամ ժամերի ջնջումներն ու ուղղումները:

Այսօր  արձանագրեց  գործով նախագահող, Երևանի Կենտրոն-Նորք-Մարաշ վարչական շրջանների դատարանի դատավոր Մխիթար Պապոյանը: Այս մասին տեղեկացնում է «Փաստինֆոն»:

Գործի գրավոր ապացույցների հետազոտման  փուլում այսօր    Ակադեմիայի համակարգչային գրաֆիկայի և դեկորատիվ կիրառական արվեստի ամբիոնի վարիչ Հայկ  Փայասլյանի պաշտպաններ Լուսինե Սահակյանն ու Երվանդ Վարոսյանը դատարանի ուշադրությունը հրավիրեցին  անհամապատասխանությունների վրա:  Պաշտպանական կողմը, մասնավորապես, կասկած հայտնեց, թե ինչպես կարող էր գործը քննող մարմինը  2 ժամում հասցնել նյութեր նախապատրաստել, գործ հարուցել, բերման ենթարկել   3   անձի, ևս 8 անձից վերցնել բացատրություններ, գործն ուղարկել  քննչական վարչություն, բազմաթիվ  որոշումներ կայացնել ու գրություններ պատրաստել:

Պաշտպանները հայտարարեցին նաև, որ հակասություններ կան երկու ամիս ժամկետով իրենց պաշտպանյալի հեռախոսային խոսակցությունների   գաղտնալսումն  ու ձայնագրառումը թույլատրելու դատարանի որոշման և քաղվածքի միջև՝ վերջինիս մեջ, ի տարբերություն առաջինի, խոսվում է վերահսկման  օպերատիվ-հետախուզական միջոցառումների մասին: Նրանք դատարանի ուշադրությունը հրավիրեցին նաև այն հանգամանքի վրա, որ դատարանը հիշյալ որոշումը կայացրել է կաշառք  տալու մասին  հաղորդում ներկայացնելուց մեկ ամիս առաջ: «Ի՞նչ նյութերի հիման վրա է դատարանը նման որոշում կայացրել»,- ասաց  Լ. Սահակյանը:

Գրավոր ապացույցների հետազոտումն ավարտվեց, մարտի 20-ի դատական նիստում կհետազոտվի հեռախոսային գաղտնալսման սկավառակը, և դատարանն ըստ ամենայնի  կանցնի  ամբաստանյալների հարցաքննությանը՝  եթե նրանք ցուցմունք տալու ցանկություն հայտնեն:

Ըստ մեղադրանքի,  Ս. Գևորգյանը և Հ. Փայասլյանը ակադեմիայի կերպարվեստի ֆակուլտետի դեկան Խ. Ազիզյանի միջնորդությամբ 2012թ ապրիլին ընդունել են ակադեմիայի դիմորդ Է. Բարբարյանի ծնողներից` Ա. Ենոքյանից և Ա. Ֆահրադյանից, առանձնապես խոշոր չափերի` 1.371.510 ՀՀ դրամին համարժեք 3.500 ԱՄՆ դոլար ստանալու առաջարկը: Այնուհետև 2012թ մայիսին Խ. Ազիզյանի միջոցով Ս. Գևորգյանը և Հ. Փայասլյանը ստացել են առանձնապես խոշոր չափերի 3.500 ԱՄՆ դոլար կաշառք` դիմորդ Է. Բարբարյանին ակադեմիա ընդունելու համար:

Քրեական գործով նախաքննությունն իրականացրել է ՀՀ ոստիկանության քննչական գլխավոր վարչության ՀԿԳ քննության վարչությունը։