Երեխաներին բարուրելը խստիվ արգելվում է. մասնագետ
Պետպատվերի շրջանակում Հայաստանում իրականացվում է նորածնային 5 սկրինինգային ծրագիր. դրանց նպատակը բնածին ախտաբանությունների վաղ հայտնաբերումն է: Այս մասին այսօր ասաց ՀՀ առողջապահության նախարարության Մոր և մանկան առողջության պահպանման վարչության պետ Կարինե Սարիբեկյանը կլոր սեղան-քննարկման ժամանակ: Նա նշեց, որ Հայաստանում կատարվում են հիպոտիրեոզի, ֆենիլկետոնուրիայի, կոնքազդրային հոդի, լսողության և տեսողության սկրինինգներ:
Մոր և մանկան առողջության պահպանման վարչության Մայրական և վերարտադրողական առողջության բաժնի պետ Գայանե Ավագյանը կլոր սեղան քննարկման ժամանակ նշեց, որ ուշ հայտնաբերված հիվանդների ծախսերը մի քանի անգամ գերազանցում են վաղ հայտնաբերման ու բուժման ծախսերը:
Արաբկիր ԲԿ-ի նորածնային սկրինինգ կենտրոնի պատասխանատու Իրինա Թովմասյան նշեց, որ բնածին հիպոտիրեոզով (նյութափոխանակության հիվանդություն) ակնկալվող քանակը Հայաստանում մոտ 1000 հիվանդ է կազմում: Սկրինիգի արդյունավետությունը ներկայացնելու համար նա նշեց, որ ուշ հայտնաբերման դեպքում հիվանդների տարեկան ծախսը կազմում է 1 մլրդ 219 մլն դրամ, իսկ վաղ հայտնաբերման դեպքում՝ 129 մլն դրամ: Իրինա Թովմասյանը նշեց, որ այս սկրինինգները ներդնելիս բավական խոչընդոտներ են եղել. երեխաների ծնողները դժվարությամբ են համաձայնել այդ սկրինինգներին. «Նաև դժվար էր համոզել ծննդատների անձնակազմին, որովհետև լրացուցիչ աշխատանք էր: Սկզբից հրաժարվողները շատ են եղել, բայց հետագայում կամաց-կամաց արդեն իրազեկվել են»: Իրինա Թովմասյանի խոսքով`եղել են նաև դատական գործեր. «Ծնողները ոչ մի կերպ չէին համաձայնում բուժմանը, և ասում էին`եթե հիվանդությունը տեսնեն, իրենց ուժերով կլուծեն խնդիրը: Դատական գործ հարուցեցին: Ծնողը պարտավորվեց այլ տեղ հետազոտություն անցնել»:
Մալայանի անվան ակնաբուժական կենտրոնի ակնաբույժ, անհասության ռետինոպաթիայի սկրինինգային ծրագրի համակարգող Ռուզաննա Հարությունյանը նշեց, որ այս հետազոտության նպատակն է՝ հայտնաբերել աչքի այնպիսի փոփոխություններ, որոնք հետագայում կուրության պատճառ կարող են դառնալ: «2 տարվա ընթացքում լազերային հետազոտվել է 1370 երեխա, լազերային վիրահատության է ենթարկվել 53 երեխա, ինչը նշանակում է, որ այդքան երեխա փրկվել է կուրությունից»:
Ջինիշյան հիշատակի հիմնադրամի առողջապահական ծրագրերի համակարգող Զարա Ջանիբեկյանը նշեց, որ հենաշարժողական ապարատի, կոնքազդրի զարգացող/բնածին հոդախախտնամենահաճախ հանդիպող բնածին ձևախախտումն է. այն աղջիկների մոտ 5-7 անգամ ավելի հաճախ է լինում, քան` տղաների։ «Հոդախախտը նախապես հայտնաբերելու և բուժելու դեպքում կծախսվի 32,000 ՀՀ դրամ: Նախապես չհայտնաբերելու և վիրահատական միջոցով բուժելու դեպքում կծախսվի 957,400 ՀՀ դրամ: Ծախսերի միջև տարբերությունը կկազմի 925,400 ՀՀ դրամ»: Ջանիբեկյանը նշեց, որ բարուրելը նպաստում է կոնքազդրային հոդախախտի զարգացմանը, այդ իսկ պատճառով երեխաներին բարուրելը խստիվ արգելվում է. «Շրջաններում, մանավանդ Ախուրյանի մոր և մանկական կլինիկայում երեխաներին բարուրում են: Բարուրել չի կարելի մի քանի պատճառներով. եթե երեխան ծնվում է և մի կոնքազդրային հոդն անհաս է, բարուրելու դեպքում այն տեղաշարժվում է: Նույն արյան հոսքը: Եթե երեխային բարուրում եք՝ արյան հոսք չկա»: Կարինե Սարիբեկյանը նշեց, որ բարուրելը ռիսկեր է պարունակում նաև առողջ երեխայի համար:
Նորածնային սկրինինգների ծրագրերն իրականացվում են բյուջետային միջոցների և միջազգային կազմակերպությունների հաշվին:
