Դիմեմ-չդիմեմ. մամուլ
«Չի բացառվում, որ Պարույր Հայրիկյանը, այնուամենայնիվ, դիմի Սահմանադրական դատարան, ընտրությունները երկու շաբաթով հետաձգելու համար։ Այս մասին երեկ մեր թղթակցին հայտնել է թեկնածուի քարոզարշավի պատասխանատու Մանյա Այվազյանը»,- գրում է «Հայկական Ժամանակ» օրաթերթը և շարունակում.
«Երեկ Հայրիկյանի ինքնազգացողությունը վատացել է։ Նրան բժիշկները թույլատրած են եղել մի քանի ժամով դուրս գալ հիվանդանոցից, մոր քառասունքին մասնակցելու համար։ Թեկնածուի վիճակը քառասունքի ժամանակ կտրուկ վատացել է, և նրան տեղափոխել են հիվանդանոց։
ՍԴ դիմելու հավանականության վերաբերյալ հարցին ի պատասխան, Այվազյանը նշել է, որ այս պահին շտաբը որոշում չի կայացրել։ «Սուրբ Գրիգոր Լուսավորիչ» ԲԿ-ից հրաժարվեցին տվյալներ տրամադրել ԱԻՄ առաջնորդի առողջության վիճակի վերաբերյալ, սակայն շտաբից հայտնեցին, որ թեկնածուի աջ ձեռքի նյարդը վնասված է, և ուժեղ ցավեր ունի»:
