Արմեն Ալավերդյանը առաջարկում է օրենսդրական փոփոխություններ՝ ստվերի դեմ պայքարելու համար
Կառավարությանն առընթեր Պետական եկամուտների կոմիտեի պետի տեղակալ Արմեն Ալավերդյանն այսօր կառավարության նիստում նշել է, որ էկոնոմիկայի նախարարության համակարգման ներքո գտնվող ոլորտում ստվեր կա, դրա համար պետք է իրականացնեն ոչ միայն վարչարարական այլև օրենսդրական փոփոխություններ: Այս մասին տեղեկացնում է panorama.am-ը։
Մինչ այդ ՀՀ էկոնոմիկայի նախարար Տիգրան Դավթյանը ներկայացրել է Էկոնոմիկայի նախարարության կողմից համակարգվող ոլորտների հարկային վճարումների հաշվետվությունը: Տ. Դավթյանը տեղեկացրել է, որ 2012թ. առաջին 10 ամիսներին Հայաստանի տնտեսական ակտիվության աճը կազմել է 7,2 տոկոս: Արդյունաբերական արտադրանքի ծավալում նշված ժամանակահատվածում արձանագրվել է 10%-ի աճ, զբոսաշրջության ոլորտում` 8,5%-ի, ծառայությունների ոլորտում` 11%-ի աճ: «Ունենք նաև արտահանման առաջանցիկ տեմպեր` մեկին երեք հարաբերակցությամբ»,- ասել է նախարարը:
Տ.Դավթյանը նշել է, որ ընդհանուր առմամբ 10 ամիսների արդյունքներով տնտեսական զարգացումները դրական դինամիկա ունեն: Սոցվճարների մասով նույնպես դրական դինամիկա կա. «Դա պայմանավորված է հարկային մուտքերով, ընդհանուր տնտեսական աճով, նաև վարչարարության բարելավմամբ»: Նշվել է նաև, որ մեծածախ և մանրածախ առևտրի ոլորտում հարկային մուտքերը նշված ժամանակահատվածում կազմել են 122 մլրդ դրամ`2011թ-ի 110 մլրդ դրամի դիմաց: Նախարարի խոսքերով` նախարարության համակարգի ոլորտում գործող ձեռնարկությունները ընդհանուր հարկային մուտքերի և սոցվճարների գծով այս տարվա ընթացքում վճարել են 243,8 մլրդ դրամի հարկ` նախորդ տարվա 215 մլրդ-ի դիմաց: «Երկրի հարկային մուտքերի 1/3-ը էկոնոմիկայի համակարգին է բաժին հասնում: Պետական եկամուտների կոմիտեի հետ շարունակաբար աշխատում ենք, այս տարվա ընթացքում կատարվել է հարկային վարչարարության միջոցառումներ, այդ թվում` մասնավոր հատվածում»,- ասել է Տ.Դավթյանը՝ հավելացնելով, որ ոլորտում ունեն 247 հազար աշխատող, որոնց թիվը նախորդ տարվա համեմատ ավելացել է 7000-ով:
Կառավարությանն առընթեր Պետական եկամուտների կոմիտեի պետի տեղակալ Արմեն Ալավերդյանն էլ նշել է, որ որքան էլ սեկտորը մեծ է` ստվեր կա, դրա համար պետք է իրականացնեն ոչ միայն վարչարարական այլև օրենսդրական փոփոխություններ: «Մտահոգիչ է աշխատողների իրական թվաքանակի պատկերը, քանի որ գտնում ենք, որ ստվեր կա աշխատողների քանակի ու աշխատավարձերի մակարդակի ուղղությամբ, քանի որ միջին հանրապետական աշխատավարձը որոշ ոլորտներում ցածր են»,- ասել է Ա.Ալավերդյանը։
