Մետաղի գնից կախված ոլորտը

Ըստ ՀՀ էներգետիկայի և բնական պաշարների նախարար Արմեն Մովսիսյանի,  հանքարդյունաբերության ոլորտի հարկերի անկումը պայմանավորված է մետաղների միջազգային գների անկմամբ։ Այդ մասին նախարարը հայտարարել է կառավարության այսօրվա նիստում՝ ներկայացնելով իր ոլորտի հարկային պարտավորությունների կատարման և տնտեսական աճի ներուժի վերաբերյալ հաշվետվությունը։

Ա. Մովսիսյանը, մասնավորապես, նշել է, որ 2012թ. առաջին 9 ամիսների ընթացքում արդյունահանվել է 19 մլն տոննա հանքաքար՝ նախորդ տարվա նույն ժամանակահատվածի 14 մլն տոննայի համեմատ: Ու չնայած այն հանգամանքին, որ արդյունահանված հանքաքարի ծավալները՝ բնեղեն արտահայտությամբ, մոտ 36%-ով աճել են, արժեքային արտահայտությամբ աճն ընդամենը 10.2% է ( (150 մլրդ դրամ՝ նախորդ տարվա 136 մլրդ դրամի դիմաց):

Էներգետիկայի նախարարը դա պայմանավորել է միջազգային շուկաներում մետաղների գնանկումով։ Ըստ նախարարի, պղնձի գները նախորդ տարվա համեմատ նվազել են մոտ 14%-ով, մոլիբդենինը՝ 26%-ով: Դա բացասաբար է ազդել հարկային ցուցանիշների վրա. ընդերքօգտագործման ոլորտում այս տարվա առաջին 9 ամիսներին հավաքագրվել են 16.7 միլիարդ դրամի հարկեր, որը 5.9 մլրդ դրամով կամ 35%-ով զիջում է նախորդ տարվա նույն ժամանակահատվածի ցուցանիշին։

Նշենք, որ մետաղների միջազգային գների անկման և դրա հետևանքով՝ տվյալ ոլորտի արդյունահանման և արտահանման ծավալների նվազման առումով լիովին համաձայն ենք։ Այդ թեմային անդրադարձել ենք 168.am-ի նախկին հրապարակումներից մեկում։

Զարմանալին այն է, որ հիմնվելով ՊԵԿ տվյալների վրա և մանրամասն ներկայացնելով ոլորտի ցուցանիշները՝ Ա. Մովսիսյանը շարունակում է համառորեն լռել նույն ՊԵԿ-ի մյուս ցուցանիշների մասին։ Խոսքը վերաբերում է ՌԴ-ից ներմուծված գազի ծավալներին և մաքսային արժեքի տվյալներին, որտեղից հստակ երևում է, որ գազի գինը հաստատ 180 դոլար չէ։ Նշենք նաև, որ նախարարության ներկայացրած տեղեկանքներում գազի արժեքի մասին որևէ հիշատակում չկա։