ԼՂՀ-ի հակաօդային պաշտպանությունն ի զորու է ոչնչացնել Բաքու ուղևորվող ինքնաթիռները. Մ. Հակոբյան
ԼՂՀ ուղևորվող քաղաքացիական ինքնաթիռներին հարվածելու պատրաստակամության մասին ադրբեջանական կողմի հայտարարություններն անհեթեթ են։ Այդ մասին, ըստ news.am-ի` հոկտեմբերի 25-ի մամուլի ասուլիսում նշել է ԼՂՀ-ի պաշտպանության նախարար Մովսես Հակոբյանը։
«Իհարկե, փաստացի հակառակորդը կարող է դա անել։ Նա Ստեփանակերտ ուղևորված ինքնաթիռներին հարվածելու զենք ունի։ Բայց ցանկանում եմ հիշեցնել, որ մենք էլ նույնը կարող ենք անել և կործանել Բաքու ուղեւորվող օդանավերը։ Բայց երբեք մեզ նման կարգի հայտարարություններ թույլ չենք տվել, թե «Բաքու ուղևորվող ինքնաթիռներին կստիպենք վայրէջք կատարել», – հիշեցրել է Մովսես Հակոբյանը։
Նրա խոսքով՝ ԼՂՀ-ի ՀՕՊ-ն այս տարի 2226 ինքնաթիռների է «ուղեկցել» Ադրբեջանի տարածք։ «Այսինքն` այդքան ինքնաթիռներ կարող էինք կործանել։ Օդային տարածքում միմյանց ինքնաթիռները ոչնչացնելու մասին խոսակցությունները լուրջ մարդկանց հարիր չեն, և միջազգային հանրությունը հանդուրժողաբար չի վերաբերվի նման գործողություններին», – ընդգծել է նախարարը՝ հավելելով, թե ինքը մտադիր է օդանավակայանում թռիչքներն սկսելուն պահից Երևան այցելել բացառապես ինքնաթիռով։
«Չեմ կարծում, թե ադրբեջանցինեը կհամարձակվեն իրագործել սպառնալիքները», – ասել է Մովսես Հակոբյանը։
Կայքը հիշեցնում է, որ Ստեփանակերտի օդանավակայանը հանձնվել է շահագործման, սակայն թռիչքներ դեռ չեն կատարվում։ Ստեփանակերտի օդանավակայանի աշխատանքը վերսկսելու հեռանկարը Ադրբեջանոմ հիստերիա է առաջացրել։ Այնտեղից պարբերաբար Ստեփանակերտ մեկնող օդանավերը «կործանելու» կամ «իջեցնելու» սպառնալիքներ են հնչում, որոնք հակասում են Քաղաքացիական ավիացիայի մասին միջազգային օրենսդրությանը։
