«Ծառուկյանը շատ բաներից տեղյակ չէ»
Երեկ Աբովյան քաղաքում տեղի ունեցան Տեղական ինքնակառավարման մարմինների ընտրություններ, որոնք աչքի ընկան բացառիկ պասիվությամբ:
Հիշեցնենք, որ Աբովյանում քաղաքապետի թեկնածություն էին առաջադրել Աբովյանի գործող՝ ԲՀԿ-ական քաղաքապետ Կարապետ Գուլոյանը, ով ԲՀԿ առաջնորդ Գագիկ Ծառուկյանի փեսան է, և «Աբովյան» հեռուստաընկերության ռեժիսոր, անկուսակցական Արտաշես Մեհրաբյանը:
Նախնական արդյունքների համաձայն, ինչպեսև սպասվում էր` Կ. Գուլոյանը վերընտրվել է քաղաքապետի պաշտոնում` ստանալով 10.186 քվե, իսկ Ա. Մեհրաբյանը` 1778 քվե: ԿԸՀ նախնական տվյալներով` 42.531 գրանցված ընտրողներից ընտրությանը մասնակցել է 12.820-ը:
Մեզ հետ զրույցում երեկ աբովյանցիներից շատերն ասում էին, թե առանց ընտրությունների էլ իրենք գիտեին` ով է ընտրվելու: Ըստ նրանց` իրենց փոխարեն ամեն ինչ որոշում է իշխանությունը: «Սա խայտառակ ընտրություն ա: Դե հըլը գնացեք ընտրատեղամասեր, կտեսնեք` ժամը մի ընտրող էլ չի գնում… ինչի՞ չեն գնում… Իսկ դուք չգիտե՞ք` ինչի, որովհետև մարդիկ արդեն գիտեն, որ սա ձևական ընտրություն ա, որ առանց մեզ հարցնելու էլ գիտեն` ում են ընտրել: Իսկ ո՞ւմ ընտրենք»,- 168.am-ի հետ զրույցում ասացին աբովյանցիները:
Ցավալին այն էր, որ աբովյանցիների մոտ առկա հուսահատության հասնող անտարբերությունը փաստացի արձանագրվում էր նաև ընտրատեղամասերում: Մինչ կեսօր մեր այցելած գրեթե բոլոր ընտրատեղամասերում քվեարկությանը մասնակցել էր ընտրողների հազիվ 10 տոկոսը, որի աճի միտումն այդպես էլ նկատելի չեղավ հաջորդող ժամերին:
Աբովյանի թիվ 28/15 ընտրատեղասում քվեարկության մասնակցող քաղաքապետի թեկնածու Ա. Մեհրաբյանը 168.am-ի հետ զրույցում ասաց, որ ինքն առաջադրել է իր թեկնածությունը, քանի որ ցանկանում է փոխել Աբովյանում տիրող մթնոլորտը: Նրա խոսքով` նույնիսկ ԲՀԿ առաջնորդը տեղյակ չէ այդ մթնոլորտի մասին: «Ես մի պահ պատկերացնում եմ ինձ Ծառուկյանի փոխարեն. եթե ես լինեի Ծառուկյանը, ես միանգամից կկանխեի, որովհետև դա առաջին հերթին իմ պատիվն ա, եթե իմ ազգականներից մեկն ինչ-որ վատ արարք է անում, դա առաջին հերթին իմ պատիվն է, դրա համար ինձ թվում է` պարոն Ծառուկյանը շատ բաներից տեղյակ չէ, որովհետև, եթե տեղյակ լիներ` կթողնե՞ր, որ սենց բաներ կատարվեին, որ 37 տարեկան ծառերը կտրեի՞ն»,- ասաց Ա. Մեհրաբյանը:
168.am-ի հարցին՝ չընտրվելու դեպքում կշնորհավորե՞ք Կ. Գուլոյանին, Ա. Մեհրաբյանը պատասխանեց. «Ոչ մի դեպքում ես իրեն չեմ շնորհավորի, չեմ շնորհավորի, որովհետև նույն ձևով պիտի շարունակի: Այ, եթե 4 տարի անցնի, ու տեսնեմ, որ ինքը փոխվեց, էդ ժամանակ ես ներողություն էլ կխնդրեմ, ոչ թե կշնորհավորեմ: Բայց հիմա չեմ շնորհավորի, հակառակը` ես կդառնամ ընդդիմություն: Այսինքն` քաղաքի ընդդիմություն, ու հեռուստատեսությունն ամեն օր ցույց կտա, և հույս ունեմ` կաբելայինն էլ կմիացնեն, ու ժողովուրդը կնայի»:
168.am-ը փորձեց որոշ հարցերի պատասխաններ ստանալ նաև Կ. Գուլոյանից, ում ընտրական շտաբի մոտ հավաքված «թիկնապահական պահակազորն» այնպիսի անառիկությամբ էր պաշտպանում նրան ու այնպիսի հանդիսավորությամբ էր կրկնում «քաղաքապետը տեղում չէ» արտահայտությունը, որ ուզում էիր հավատալ այդ ակնհայտ ստին:
Բանն այն է, որ մեր այցելության պահին պարոն Գուլոյանի ավտոմեքենան գտնվում էր ընտրական շտաբի բակում, իսկ քաղաքապետն էլ` շտաբի ներսում…
