Աշխարհի առաջատար տնտեսագետները կոչ են անում վերացնել օֆշորները
Ավելի քան 300 տնտեսագետ դիմում է ստորագրել՝ ուղղված Մեծ Բրիտանիայի վարչապետ Դևիդ Քեմերոնին ու մյուս երկրների ղեկավարներին, որտեղ խոսվում է օֆշորային գոտիների գործունեության դադարեցման անհրաժեշտության մասին, հայտնում է BBC-ն:
Նամակում ընդգծվում է, որ օֆշորները մեծացնում են կոռուպցիայի մակարդակն աշխարհում և օգնում են միջազգային կորպորացիաներին այլոց հաշվին ստանալ ֆինանսական եկամուտներ:
Փաստաթուղթը հրապարակվել է Լոնդոնում այդ շաբաթ բացվող կոռուպցիայի դեմ պայքարի համաժողովի նախօրեին:
Դիմումը ստորագրել են նաև Նոբելյան մրցանակի դափնեկիր Անգուս Դիթոնը, ԱՄՀ-ի նախկին գլխավոր տնտեսագետ Օլիվիե Բլանշարն ու Սասեքսի համալսարանի պրոֆեսոր Մարիանա Մացուկատոն:
Հիշեցնենք, որ մեկ ամիս առաջ պանամական Mossaсk Fonseca իրավաբանական ընկերության միլիոնավոր փաստաթղթերը գրավեցին բոլորի ուշադրությունը օֆշորների գործունեության նկատմամբ:
Դրանցում նշվում է, որ Mossack Fonseca-ն մի շարք դեպքերում օգնել է հաճախորդներին փող լվանալ, խուսափել պատժամիջոցներից և հարկեր վճարելուց: