Լոնդոնն ու Փարիզը խոստանում են ուժեղացնել ԴԱԻՇ-ի դեմ ուղղված հարվածները
Ֆրանսիան ու Մեծ Բրիտանիան կուժեղացնեն ավիահարվածները Սիրիայում ու Իրաքում ԴԱԻՇ-ի դիրքերին, հայտարարել է Ֆրանսիայի նախագահ Ֆրանսուա Օլանդը Մեծ Բրիտանիայի վարչապետ Դևիդ Քեմերոնի հետ բանակցություններից հետո:
«Մենք կուժեղացնենք մեր հարվածները՝ ընտրելով այնպիսի թիրախներ, որոնց ոչնչացումը առավելագույնս վնաս կհասցնի ահաբեկիչների բանակին»,- նրա խոսքերը հայտնում է AFP-ն:
Իր հերթին, Քեմերոնը հայտնել է, որ իրենք Օլանդի հետ պայմանավորվել են համագործակցել միջազգային ահաբեկչության դեմ պայքարում:
Մասնավորապես, Փարիզն ու Լոնդոնը կավելացնեն տվյալների փոխանակումը, որոնք առնչվում են ուղևորատար ավիաչվերթերին:
Մինչ հանդիպումը Օլանդն ու Քեմերոնը ծաղկեպսակներ են դրել «Բատակլան» համերգասրահի մոտ, որտեղ նոյեմբերի 13-ին զինված ահաբեկիչները պատանդ էին վերցրել հանդիսատեսին:
Ընդհանուր առմամբ՝ փարիզյան ահաբեկչություններին զոհ է գնացել 130 մարդ, ևս 350 մարդ վնասվածքներ է ստացել:
