Իրանի վրա ճնշում բանեցնելն անիմաստ է. Հասան Ռոուհանի
Իրանական ISNA լրատվական գործակալության փոխանցմամբ՝ Իրանի նախագահ Հասան Ռոուհանին հայտարարել է, որ Իրանը մտադիր է հետագայում նույնպես զբաղվել միջուկային տեխնոլոգիաների ներդրմամբ՝ իր ատոմային խաղաղ էներգետիկայի զարգացման համար:
Նրա խոսքերով՝ Իրանի միջուկային ծրագրի ծնդրի լուծումը գտնվում է բացառապես քաղաքական հարթության վրա, և այդ որոշումը պահանջում է բանակցություններին մասնակցող երկու կողմի մոտ քաղաքական կամքի առկայություն: Ռոուհանին ընդգծել է, որ իրենք ցանկանում են հնարավորինս շուտ լուծել այդ խնդիրը: Ռոուհանին վերահաստատել է, որ Իրանի միջուկային ծրագիրը կրում է խաղաղ բնույթ:
Անդրադառնալով Իրանի ու «Վեցյակի» միջև բանակցություններին, ինչպես նաև ԱՄՆ Կոնգրեսի կողմից Իրանի հանդեպ նոր պատժամիջոցներ սահմանելու մտադրությանը՝ Ռոուհանին հայտարարել է, որ Իրանի վրա ճնշում բանեցնելն անիմաստ է. «Ինչպես ճնշումը, այնպես էլ պատժամիջոցները, երկկողմանի սուր են, որը վնաս է պատճառում երկու կողմին»:
