Աքքույուի ատոմակայանի կառուցման աշխատաքները Թուրքիայում կմեկնարկեն մինչև մարտ. Կիրիենկո
![](https://168.am/wp-content/uploads/2014/12/938838874.jpg)
Ռուսական РИА Новости լրատվական գործակալության փոխանցմամբ՝ «Ռոսատոմ» պետական կորպորացիայի գլխավոր տնօրեն Սերգեյ Կիրիենկոն երեկ հայտարարել է, որ Թուրքիայում նոր ատոմակայանի էլեկտրաէներգիայի մատակարարման մասին պայմանագիրը պետք է համաձայնեցվի մինչև տարեվերջ.
«Մինչև տարեվերջ պետք է համաձայնեցվի էլեկտրաէներգիայի գնման պայմանագիրը, քանի որ մենք ինքներս ենք կառուցում կայանը, մենք ենք տիրում նրան և շահագործում, իսկ թուրքական պետական ընկերությունը կնքում է երաշխավորված պայմանագիր՝ նախապես համաձայնեցված գնով էլեկտրաէներգիա գնելու համար, ինչն էլ կծածկի մեր համապատասխան ծախսերն ու կատարած ներդրումները»:
Կիրիենկոյի խոսքերով՝ աշխատանքներն ընթանում են լայն թափով, և կողմերը բոլոր պայմանավորվածությունները կատարում են գրաֆիկին համապատասխան: Կիրիենկոն հավելել է, որ Աքքույուի ատոմակայանի կառուցումը Թուրքիայում մեկնարկելու է մինչև մարտ.
«Ելնում ենք նրանից, որ մինչև մարտ մենք կսկսենք շինհրապարակում անմիջական աշխատանքները: Արդեն իսկ ընթանում է սարքավորումների համապատասխան պատվերը, պատրաստում են մասնագետներ»: Կիրիենկոն չի բացառել, որ «Ռոսատոմը» կարող է ատոմային այլ նախագծեր նույնպես իրականացնել Թուրքիայում:
Աքքույուի ատոմակայանի կառուցման ու շահագործման մասին պայմանագիրը Ռուսաստանն ու Թուրքիան ստորագրել են 2010 թվականին: Աքքույուի ատոմակայանն ունենալու է 4 էներգաբլոկ, որոնցից յուրաքանչյուրի հզորությունը կազմելու է 1200 մեգավատտ: Նախագիծը գնահատվում է մոտ 20 միլիարդ դոլար: