Էրդողանն այսօր Ադրբեջանում կքննարկի ԼՂ-ի հարցը
Թուրքական TRT Haber հեռուստաալիքի փոխանցմամբ՝ Թուրքիայի վարչապետ Ռեջեփ Էրդողանն այսօր մեկնում է Ադրբեջան: Այցից առաջ լրագրողների հետ զրույցում Էրդողանը հայտարարել է, որ Ադրբեջանում քննարկելու է Ղարաբաղյան հակամարտության կարգավորման հարցը. «Թուրքիան ծանրակշիռ դեր է խաղում Հարավային Կովկասում կայունության ու խաղաղության հաստատման հարցում»
Էրդողանի խոսքերով՝ թուրք-ադրբեջանական հարաբերությունները «կրում են» բացառիկ բնույթ՝ հավելելով, որ իր այցը կնպաստի դրանց էլ ավելի ամրապնդմանը: Էրդողանն ընդգծել է, որ իր ադրբեջանական այցի ընթացքում քննարկելու է նաև տարածաշրջանում երկու երկրների կողմից իրականացվող խոշոր նախագծերի հարցը:
Էրդողանը մանրամասնել է, որ դա մասնավորապես վերաբերում է «Բաքու-Թբիլիսի-Կարս» երկաթուղու և «Անդրանատոլիական» գազատարի (TANAP) նախագծերին, որոնք ոչ միան տարածաշրջանային, այլև՝ միջազգային բնույթի նախագծեր են: Էրդողանի այս այցը կլինի Թուրքիայում անցկացված ՏԻՄ ընտրություններից հետո նրա՝ արտասահմանյան առաջին այցը:
