Մոլորակի ամենահարուստ կինը Քրիստի Ուոլթոնն է. Forbes
Forbes պարբերականը հայտնել է մոլորակի ամենահարուստ կնոջ անունը: Wal-Mart-ի համասեփականատեր Քրիստի Ուոլթոնն այդ հարցում գերազանցել է L’Oreal ընկերության ժառանգորդուհի Լիլիան Բետանկուրին, որի կարողությունը գնահատվել է 34.5 միլիարդ դոլար:
Մինչդեռ Ուոլթոնի կարողությունը Forbes-ը գնահատել է 36.7 միլիարդ դոլար: Ուոլթոնը վերջին 5 տարում արդեն չորրորդ անգամ է ճանաչվում Forbes-ի վարկածով մոլորակի ամենահարուստ կին: Լիլիան Բետանկուրն իր հերթին կորցրել է մոլորակի ամենահարուստ կնոջ դիրքերը՝ չնայած նրան, որ նախորդ տարի նրա ունեցվածքն աճել է 9 տոկոսով:
Երրորդ տեղում է հայտնվել Wal-Mart-ի հիմնադրի դուստր Էլիս Ուոլթոնը՝ 34.3 միլիարդ դոլար: Mars ընտանիքի երրորդ սերնդի ներկայացուցիչ և հրուշակեղենի խոշորագույն ընկերության մենեջեր Ժակլին Մարսը զբաղեցրել է 4-րդ տեղը՝ 20 միլիարդ դոլար:
Ավստրալական Hancock Prospecting հանքարդյունաբերական ընկերությունը գլխավորող Ջոնինա Ռայնհարտը 5-րդն է՝ 17.7 միլիարդ դոլար: 6-րդ տեղում Սյուզան Կլատենն է, ով իր եղբոր ու մոր հետ տիրում է BMW ավտոկոնցեռնի բաժնետոմսերի 50 տոկոսին:
Forbes-ի՝ համաշխարհային միլիարդատերերի այս տարվա ցանկում ընդգրկվել է 1645 մարդ, որոնցից 172-ը կանայք են (նախորդ տարի միլիարդատեր կանանց քանակը կազմել է 138): Միլիարդատերերի ցուցակում հայտնվել է 6 հայ:
