Հովհաննես Իգիթյանը` Պրահայում Սերժ Սարգսյանի հնչեցրած հայտարարությունների մասին. «Ես տեսնում եմ վախեցած մարդու արտահայտություններ»
![](https://168.am/wp-content/uploads/2012/08/H.Igityan-e1344361815674.jpg)
Երեկ Պրահայում Չեխիայի նախագահ Միլոշ Զեմանի հետ հանդիպումից հետո տեղի ունեցած համատեղ ասուլիսում ՀՀ նախագահ Սերժ Սարգսյանը՝ պատասխանելով «Ազատություն» ռ/կ-ի հարցերին՝ ի՞նչն է Հայաստանին ստիպում այդքան արագ միանալ այդ միությանը, և սա այն դեպքում, երբ այդ միության նախաձեռնող երկիր Ռուսաստանն անտարբերությամբ է հետևում, թե ինչպես են մեր սահմանամերձ շրջաններն ամեն օր գնդակոծության ենթարկվում Ադրբեջանի կողմից, և եթե Ռուսաստանը ՀԱՊԿ շրջանակներում Հայաստանի դաշնակիցն է, ապա ինչպե՞ս կմեկնաբանեք այն փաստը, որ Ռուսաստանը հսկայական քանակությամբ զենք է վաճառում Ադրբեջանին, նախ ասել էր, թե ինքը սովոր չէ բողոքելու, հետո ավելացրել էր.
«Երկրորդը, ցանկացած գործ, որին ձեռնամուխ ես լինում, պետք է հնարավորինս արագ և որակով անել: Եթե մենք որոշել ենք միանալ ՄՄ-ին, ապա դա պետք է անենք հնարավորինս արագ, ինչո՞ւ դանդաղեցնենք: Եթե մեր որոշման հիմքում ընկած է ազգային շահը, ապա այդ որոշումը պետք է օր առաջ իրականություն դարձնել: Մաքսային միությունը տնտեսական կառույց է և ոչ ռազմական: Բնավ, պետք չէ կասկածի տակ դնել հայ-ռուսական ռազմավարական համագործակցությունը: Այո´, Ռուսաստանը համագործակցում է նաև Ադրբեջանի հետ, բայց դա չի նշանակում, որ մենք իրավունք և հնարավորություն ունենք ռուսական կողմին արգելելու համագործակցությունը Ադրբեջանի հետ»:
Հայոց համազգային շարժում (ՀՀՇ) կուսակցության վարչության անդամ, Ազգային ժողովի արտաքին հարաբերությունների հանձնաժողովի նախկին նախագահ Հովհաննես Իգիթյանը 168.am-ի հետ զրույցում՝ մեկնաբանելով Սերժ Սարգսյանի՝ Մաքսային միություն շտապելու վերաբերյալ հայտարարությունները, նախ նշեց, որ մենք ընդհանրապես չպետք է մտնենք ՄՄ, հետևաբար` չպետք է շտապենք:
«Սերժ Սարգսյանը փորձում է արագացնել, ինձ թվում է` դրա կարիքը չկա, որովհետև Սերժ Սարգսյանին և իր փորձագետներին ավելի շատ ժամանակ է պետք հասկանալու, որ ՄՄ-ն ոչ միայն քաղաքական և տնտեսական ապագա չէ Հայաստանի համար, այլ նաև վնաս է բերելու: Այս իմաստով` գտնում եմ, որ կառավարությունն ավելի դանդաղ պետք է գնա այս գործընթացով, որպեսզի հասկանա, որ դա բացի վնասից` որևէ օգուտ չի բերելու,- ասաց Հովհաննես Իգիթյանը:- Ես զարմանում եմ, որ Հայաստանի քաղաքական գործիչները, հատկապես՝ իշխանական գործիչները և նաև Սերժ Սարգսյանը անում են հայտարարություններ, որ կարող էր Լավրովն անել կամ Պուտինը:
Նրանք շատ հաճախ ավելի կաթոլիկ են ձևանում, քան Հռոմի պապը. ավելի ռուսամետ են, քան ինքը Պուտինը: Բոլորը դեպքերում ես գտնում եմ, որ Սերժ Սարգսյանը պետք է իր անհամաձայնությունը և դժգոհությունը հայտնի` Ռուսաստանի այս դիրքորոշման հետ կապված: ՀՀ արտգործնախարարությունը պետք է նոտաներ հղի Ռուսաստանին և այլն: Այսինքն` եթե հայկական կողմը չի կարողանում ազդել Ռուսաստանի վրա, գոնե «դիսկոմֆորտ» պետք է ստեղծի, որ այդքան էլ համաձայն չէ Ռուսաստանի հետ կամ ուղղակի դժգոհ է»:
Իսկ մեր հարցին, թե, այնուամենայնիվ, Սերժ Սարգսյանի` «մենք իրավունք և հնարավորություն չունենք ռուսական կողմին արգելելու» արտահայտության մեջ կա՞ դիվանագիտորեն քողարկված դժգոհություն, միջազգային հարաբերությունների փորձագետ Հովհաննես Իգիթյանը պատասխանեց. «Ի՞նչ է նշանակում` մենք իրավունք կամ հնարավորություն չունենք: Դիվանագիտության մեջ դժգոհությունները արտահայտելու ձևեր կան, և սովորաբար դա արվում է հայտարարություններով կամ բողոքի նոտաներով: Ես նույնիսկ թաքնված դժգոհություն չեմ տեսնում, ես տեսնում եմ վախեցած մարդու արտահայտություններ: Կարող է` ինքը հոգու խորքում ինչ-որ դժգոհություն ունի, որն արտահայտում է խոհանոցում կամ իր ընկերներին` սեղանի շուրջ, բայց դիվանագիտության մեջ այդպես չի արվում»: