Վերջին օրերին Կիևում բժիշկների օգնությանն է դիմել մոտ 1500 ցուցարար. ակտիվիստ
Ռուսական Интерфакс լրատվական գործակալության փոխանցմամբ՝ վերջին օրերին Կիևում գրեթե 1500 մարդ դիմել է այսպես կոչված ազգային դիմակայության («Եվրամայդան») շտաբի բժշկական ծառայությանը և այսպես կոչված բժշկական օգնության մոբիլ բրիգադներին, որոնք շրջում են քաղաքի կենտրոնում կառուցված բարիկադների մոտ:
Այս մասին հայտարարել է «Եվրամայդանի» բժշկական ծառայության համակարգող Օլե Մուսիյը: Նրա խոսքերով՝ բուժօգնություն ստանալու համար իրենց դիմածների մոտ 80 տոկոսը վնասվածքներ է ստացել մարմնի, ձեռքերի ու ոտքերի շրջանում: Ակտիվիստն Առողջապահության նախարարությանը կոչ է արել հետաքննել տվյալ փաստերը և ընդգծել է, որ իրենք տուժածների տվյալները չեն ներկայացնելու իրավապահներին:
Կիևում ցուցարարների ու ոստիկանների միջև բախումները շարունակվում են հունվարի 19-ից:
