Սիրիական հակամարտության զոհերի քանակը հասել է մոտ 130.000-ի. զեկույց
Թուրքական TRT Haber հեռուստաալիքի փոխանցմամբ՝ Սիրիական հակամարտության զոհերի քանակը հասել է մոտ 130.000-ի: Այս մասին նշված է Մարդու իրավունքների սիրիական կազմակերպության հրապարակած զեկույցում:
Դրանում ընդգծվում է, որ 1000 օրվա ընթացքում Սիրիական հակամարտության զոհերի քանակը հասել է 129.403-ի, որից 102.759-ը խաղաղ քաղաքացիներ են: Զոհերի թվում կա 12.148 երեխա և 11.035 կին: Ընդ որում, նշված է, որ 3461 մարդ, այդ թվում նաև 29 կին ու 91 երեխա զոհվել են կտտանքների հետևանքով:
Զեկույցում նշված է, որ Ասադի վարչակարգը կալանքի տակ է պահում 215.000 մարդու, այդ թվում նաև 9000 երեխայի ու 4500 կնոջ: 2011 թվականի մարտին մեկնարկած բախումների ընթացքում ավերվել է ավելի քան 900.000 շինություն՝ ներառյալ հիվանդանոցներ, դպրոցներ, մզկիթներ ու եկեղեցիներ, 7500 կանանց բռնաբարել են վարչակարգի ներկայացուցիչները:
Զեկույցում ուշադրություն է հրավիրվում նրա վրա, որ հակամարտության հետևանքով Սիրիայում տանիքից զրկվել է 6.395.000 մարդ, 3.600.000-ը փախել է արտերկիր:
