ԱՊՀ երկրների քաղաքացիների համար կարող է պարտադիր դառնալ ՌԴ-ում աշխատանքային վիզա ստանալը. Известия
Ռուսական Известия թերթի փոխանցմամբ՝ Պետդումայում ներկայացված կոմունիստները ցանկանում են բարդացնել ԱՊՀ երկրներից ներգաղթյալների մուտքը Ռուսաստան: Խմբակցությունը պատրաստել է մի օրինագիծ, որը հետխորհրդային երկրների քաղաքացիներին պարտադրում է ստանալ աշխատանքային վիզաներ:
Խոսքը գնում է Հայաստանի, Ադրբեջանի, Ուկրաինայի, Մոլդովայի, Ուզբեկստանի, Ղրղզստանի ու Տաջիկստանի մասին: Մերձբալթյան երկրների, Վրաստանի ու Թուրքմենստանի քաղաքացիների պարագայում արդեն իսկ գործում է աշխատանքային վիզայի ռեժիմը:
Բացառություն է արվում միայն երկու երկրի քաղաքացիների համար: Խոսքը Բելառուսի ու Ղազախստանի մասին է, որոնք հանդիսանում են Մաքսային միության անդամ: Ներկայումս ԱՊՀ երկրների քաղաքացիների համար պարտադիր չէ Ռուսաստանում աշխատելու համար ժամկետային աշխատանքային վիզայի ստացումը: Դրա համար նրանց անհրաժեշտ է ստանալ միայն աշխատանքի թույլտվություն կամ արտոնագիր:
Նշվում է, որ այս ամենի հետ մեկտեղ Ռուսաստանի հետ ոչ վիզային ռեժիմ հաստատած այլ երկրների քաղաքացիները Ռուսաստանի տարածքում աշխատելու համար պետք է անպայմանորեն ստանան աշխատանքային վիզաներ: Ընդ որում, ԱՊՀ երկրներից սովորաբար Ռուսաստան են գալիս սևագործներ կամ ցածր որակավորում ունեցող անձնակազմ, մինչդեռ արտասահմանից հիմնականում գալիս են որակյալ մասնագետներ:
