8 տարի է, ինչ իշխանության եք, հերիք չի՞ ներկայումս կատարվողը փորձեք արդարացնել նախկինում եղածով. Աննա Իսրայելյան
Aravot.am կայքի խմբագիր Աննա Իսրայելյանը գրում է. «Ու որ չեն ասում՝ նախկինում ներողություն չեն խնդրել… Տասնյակ դեպքեր կարող եմ թվարկել՝ հենց իմ կամ մեր խմբագրության աշխատակիցների հետ պատահած:
Այս մասին էլի եմ հիշատակել: ՀՀԿ-ի պատգամավորներից մեկը՝ Նահապետ Գեւորգյանը («Նովոն») ինձ ասել էր՝ «կտամ, գլուխդ կցխեմ պատերին»: ԱԺ նախագահ Տիգրան Թորոսյանից սկսած՝ ՀՀԿ փոխնախագահ Արմեն Աշոտյանով ավարտած, ներողություն էին խնդրում: Վերջում Նահապետ Գեւորգյանին էլ բերեցին՝ ներողություն խնդրեց ինձնից: Ընդ որում՝ բերողը Գուրգեն Արսենյանն էր, որն այն ժամանակ իշխող մեծամասնության հետ կոալիցիայի մեջ էր:
Երեւանի քաղաքապետի թիկնապահները քաշքշել էին մեր լրագրող Գոհար Հակոբյանին: Տարոն Մարգարյանը զանգեց լրագրողին ու ներողություն խնդրեց՝ ասելով, թե «պագոնններս» չեն ընկնի, որ անձամբ էլ ներողություն խնդրեմ: Մինչ այդ էլ փոխքաղաքապետն էր ներողություն խնդրել ու քաղաքապետի խոսնակը:
Բայց ախր այստեղ կարեւորն այնքան էլ նախադեպերը եւ օրինակները չեն: Ոչ էլ անգամ համեմատությունը, թե որքանով էին նախկինում եւ այժմ այս ներողությունները անկեղծ: Գլխավոր հարցադրումն, ըստ իս, այս է՝ 8 տարի է, ինչ իշխանության եք, հերիք չի՞ ներկայումս կատարվողը փորձեք արդարացնել նախկինում եղածով»:
