ԶԼՄ-ներում հայտնվել է Թրամփի և Պուտինի օգնականների գաղտնի զրույցի ձայնագրությունը
ԱՄՆ նախագահի հատուկ բանագնաց Սթիվ Ուիթքոֆն անցյալ ամիս հեռախոսազրույց է ունեցել Կրեմլի բարձրաստիճան պաշտոնյայի հետ՝ առաջարկելով միասին աշխատել Ուկրաինայի համար առաջարկի վրա, որը կլինի նախկինում Գազային արված առաջարկի նման: Նա նաև նշել է, որ Պուտինը պետք է այդ հարցը բարձրացնի Թրամփի հետ զրույցում․ գրում է Bloomberg-ը՝ հրապարակելով խոսակցության ձայնագրության ընդարձակ սղագրությունը։
Հոկտեմբերի 14-ին տեղի ունեցած հեռախոսազրույցի ժամանակ Ուիթքոֆը խորհուրդ է տվել Պուտինի արտաքին քաղաքականության հարցերով գլխավոր օգնական Յուրի Ուշակովին, թե ինչպես պետք է Ռուսաստանի առաջնորդը քննարկի այդ հարցը Թրամփի հետ։ Նրա ցուցումները ներառում էին առաջարկներ՝ Զելենսկու՝ Սպիտակ տուն այցից առաջ Թրամփ-Պուտին հեռախոսազրույց կազմակերպելու և Գազայի համաձայնագիրը որպես առիթ օգտագործելու վերաբերյալ։
«Հնարավոր է՝ նա նախագահ Թրամփին ասի՝ գիտեք, Սթիվը և Յուրին քննարկել են խաղաղության հասնելու շատ նման 20 կետանոց ծրագիր, և մենք կարծում ենք, որ սա կարող է մի փոքր առաջ մղել իրավիճակը, և մենք բաց ենք նման առաջարկների համար», – Ուիթքոֆի խոսքերն է մեջբերում Bloomberg-ը։
Դրանից հետո Ուշակովը, իբր, հայտարարել է, որ սա կքննարկի իր «ղեկավարի» հետ։
Զելենսկին այցելել է Վաշինգտոն հոկտեմբերի 17-ին, իսկ 16-ին Պուտինը և Թրամփը հեռախոսազրույց են ունեցել։
Այնուհետև, ըստ Bloomberg-ի, տեղի է ունեցել ևս մեկ զրույց հակամարտության կարգավորման նոր ծրագրի վերաբերյալ։ Այն, իբր, տեղի է ունեցել հոկտեմբերի 29-ին Յուրի Ուշակովի և Ռուսաստանի ուղղակի ներդրումների հիմնադրամի (RDIF) ղեկավար Կիրիլ Դմիտրիևի միջև։
Զրույցի ընթացքում, ըստ գործակալության, նրանք քննարկել են համաձայնագրի ռուսական տարբերակը, որը, իբր, RDIF-ի ղեկավարը առաջարկել է ոչ պաշտոնապես փոխանցել ամերիկյան կողմին Մայամիի բանակցությունների ժամանակ։
Ձայնագրության աղբյուրները չեն բացահայտվել, իսկ թեման շարունակում է քննարկվել միջազգային լրատվամիջոցներում:
