Իրանի միջուկային դոսյեն պետք է հանվի ՄԱԿ-ի ԱԽ օրակարգից՝ 2231 բանաձևի ժամկետի լրանալուց հետո․ ԱԳՆ հայտարարություն
Իրանի արտաքին գործերի նախարարությունը հայտարարում է, որ ՄԱԿ-ի Անվտանգության խորհրդի 2231 բանաձևի պաշտոնական ժամկետը լրանալուց հետո երկրի միջուկային դոսիեն պետք է հանվի Անվտանգության խորհրդի օրակարգից, հաղորդում է Mehr-ը։
Արտաքին գործերի նախարարությունը հրապարակել է հայտարարություն, որում ընդգծվում է ՄԱԿ-ի Անվտանգության խորհրդի 2231 բանաձևի և դրա համապատասխան դրույթների ու սահմանափակումների ժամկետի ավարտը, ինչպես նաև Խորհրդի օրակարգից Իրանի խաղաղ միջուկային էներգետիկ ծրագրի բացառումը։
Հայտարարության մեջ ընդգծվում է, որ շաբաթ օրը բանաձևով սահմանված 10-ամյա ժամկետի ավարտից հետո Իրանի միջուկային ծրագիրը պետք է դիտարկվի այնպես, ինչպես ցանկացած այլ ոչ միջուկային զենք ունեցող պետության ծրագիրը՝ համաձայն «Միջուկային զենքի չտարածման մասին պայմանագրի» (ՄԶՉՊ), հաղորդում է Press TV-ն։
Այս պահից երկիրը կապված է բացառապես ՄԶՉՊ-ի շրջանակներում իր իրավունքներով և պարտավորություններով՝ առանց որևէ լրացուցիչ սահմանափակումների, որոնք կներդրվեին կամ կճանաչվեին, նշվում է փաստաթղթում։ Հայտարարության մեջ ընդգծվում է, որ Անվտանգության խորհրդի օրակարգում Իրանի միջուկային խնդրի ընդգրկման սկզբնական նպատակը՝ հարակից ծրագրի խաղաղ բնույթի ստուգումը, ամբողջությամբ իրականացվել է։ Այս պնդումը, հավելել է նախարարությունը, հաստատվում է այն փաստով, որ Ատոմային էներգիայի միջազգային գործակալության (ԱԷՄԳ) ոչ մի զեկույցում չի նշվել երկրի միջուկային գործունեության ռազմական նպատակներով որևէ շեղում, չնայած Միացյալ Նահանգների և նրա եվրոպացի դաշնակիցների քաղաքական ճնշմանը։
Հայտարարության մեջ նաև ընդգծվում է, որ Իրանը «հետևողականորեն հավատարիմ է մնացել իր միջուկային պարտավորություններին՝ ըստ Համատեղ գործողությունների համապարփակ ծրագրի (ՀԳՀԾ), որը 2015 թվականի միջուկային համաձայնագիր է և հաստատվել է 2231 բանաձևով, չնայած խիստ պատժամիջոցներին, մինչդեռ արևմտյան պետությունները բազմիցս խախտել են իրենց պարտավորությունները»։
«Համաձայնագրից անօրինական և միակողմանի դուրս գալուց զատ, Միացյալ Նահանգները վերականգնել է Իրանի Իսլամական Հանրապետության դեմ պատժամիջոցները և ավելի խիստ տնտեսական միջոցներ կիրառել երկրի նկատմամբ։ Եվրոպական եռյակը նաև կասեցրել է Իրանի հետ առևտուրը՝ հրաժարվելով կատարել Վաշինգտոնին համաձայնագրին վերադարձնելու իրենց խոստումը», – նշվում է Արտաքին գործերի նախարարության հայտարարության մեջ։
Հայտարարության մեջ նաև դատապարտվում է այն փաստը, որ Եվրոպական եռյակը ևս մեկ քայլ է կատարել ՀԳՀԾ-ի շրջանակներում այսպես կոչված «snapback» մեխանիզմի ակտիվացման ուղղությամբ, որը նախատեսում է արևմտյան դաշնակիցների և Անվտանգության խորհրդի կողմից երկրի դեմ միջուկային գործունեության հետ կապված պատժամիջոցների վերականգնում:
