Պուտինը հայտարարել է, որ Թրամփի հետ բանակցություններն անցել են կառուցողական մթնոլորտում
Ռուսաստանի նախագահ Վլադիմիր Պուտինը հայտարարել է, որ ԱՄՆ նախագահ Դոնալդ Թրամփի հետ իր բանակցություններն անցել են կառուցողական մթնոլորտում:
«Մեր բանակցություններն անցել են կառուցողական և փոխադարձ հարգանքի մթնոլորտում, շատ հանգամանալից և օգտակար են եղել»,-ասել է Պուտինը Թրամփի հետ համատեղ մամուլի ասուլիսի ժամանակ:
Նա շնորհակալություն է հայտնել Թրամփին Ալյասկա գալու առաջարկի համար, որի հետ կապված է Ռուսաստանի և ԱՄՆ-ի ընդհանուր պատմության զգալի մասը:
ՌԴ նախագահը պատմել է, թե ինչպես է սկսել զրույցը իր ամերիկացի գործընկերոջ հետ. «Բարի օր, սիրելի հարևան, հաճելի է Ձեզ ողջ և առողջ տեսնել»։
Պուտինի առանցքային հայտարարությունները համատեղ մամուլի ասուլիսի ժամանակ․
- Ուկրաինայի անվտանգությունը, անշուշտ, պետք է ապահովվի, և Ռուսաստանը պատրաստ է աշխատել այդ ուղղությամբ։
- Այսօրվա պայմանավորվածությունները հենակետ կդառնան ոչ միայն ուկրաինական հակամարտության կարգավորման, այլև Ռուսաստանի և ԱՄՆ-ի միջև հարաբերությունների վերականգնման համար։
- Եթե Թրամփը նախագահ լիներ 2022 թվականին, Ուկրաինայում ռազմական գործողություններ չէին լինի։ Պուտինը հիշեցրել է, որ փորձում էր Բայդենին համոզել չհասցնել այնպիսի կետի, որից հետո ռազմական գործողություններն անխուսափելի կդառնան:
Պուտինն ու Թրամփը համատեղ մամուլի ասուլիսի ժամանակ չեն պատասխանել լրագրողների հարցերին՝ սահմանափակվելով հայտարարություններով:
