Պետքարտուղարությունը հավանություն է տվել Լեհաստանին 1,33 մլրդ դոլարի օդ-օդ դասի հրթիռների վաճառքին
ԱՄՆ պետքարտուղարությունը հավանություն է տվել Վարշավային 1,33 միլիարդ դոլարի օդ-օդ դասի չորս հարյուր AIM-120D հրթիռների խմբաքանակի մատակարարմանը։
Այս մասին հայտնել է ԱՄՆ պաշտպանական անվտանգության համագործակցության գործակալությունը, որը պատասխանատու է միջկառավարական պայմանագրերով արտասահմանին ռազմական տեխնիկայի և զենքի մատակարարումների համար։
Մատակարարումը կներառի նաև հրթիռների փոխադրման կոնտեյներներ, ուղղորդման համակարգերի լրակազմեր, ծրագրային ապահովում, պահեստամասեր և այլ սարքավորումներ:
Ըստ գործակալության հայտարարության՝ առաջարկվող վաճառքը կաջակցի Միացյալ Նահանգների արտաքին քաղաքականության նպատակներին և ազգային անվտանգությանը՝ բարելավելով ՆԱՏՕ-ի դաշնակցի անվտանգությունը։
Բացի այդ, նշվում է, որ առաջարկվող վաճառքը կբարելավի Լեհաստանի հնարավորությունը՝ դիմակայելու ներկա և ապագա սպառնալիքներին, տրամադրելով օդ-օդ պաշտպանություն՝ «պաշտպանելու լեհական և դաշնակիցների ուժերին»:
