«Բացեցի հեռախոսս, համարների ցանկի վերջում նորից գտա համարը` «Գեղամյաններ». զանգեցի, զանգս տեղ չհասավ…»
Վարուժան Գեղամյանը տելեգրամյան իր ալիքում գրում է.
«ԶԱՆԳԸ
Կենտրոնի աղմուկից փրկող մեծ պատուհանի մոտ նստած աշխատակցուհին հարցնում է.
– Մի հատ էլ տան հեռախոսի համար ասե՛ք:
Նայում եմ հեռախոսիս մեջ ու թելադրում թվերը`
– +374 4775….:
– Էս Լոռո՞ւ կոդն ա:
– Ո´չ, Քաշաթաղի:
– Դա ո՞ր մարզում է:
– Արցախում է:
– Բայց սա չի գործում, չէ՞:
– Ո´չ:
– Իսկ ինչո՞ւ եք պահել:
– Իսկ դուք կարո՞ղ եք տան համարը ջնջել:
Լռեցինք:
Ստորագրեցի ու դուրս եկա:
Բացեցի հեռախոսս, համարների ցանկի վերջում նորից գտա համարը` «Գեղամյաններ»:
Զանգեցի:
Զանգս տեղ չհասավ:
Գուցե այս մի զանգս հասնի շատերին»:
