ՀԱՊԿ սպասվող գագաթնաժողովին Հայաստանի մասնակցել կամ չմասնակցելը ինքնիշխան և անկախ երկրի որոշումն է․ Իմանղալի Թասմաղամբետով
Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Իմանղալի Թասմաղամբետովի կարծիքով՝ 2024 թվականին ՀԱՊԿ գագաթնաժողովին Նիկոլ Փաշինյանի մասնակցությունը կամ չմասնակցությունն ինքնիշխան և անկախ երկրի որոշումն է։
Այս մասին հայտնում է ՏԱՍՍ-ը՝ մեջբերելով կազմակերպության գլխավոր քարտուղարի խոսքերը։
«2024 թվականին ՀԱՊԿ գագաթնաժողովին Նիկոլ Փաշինյանի մասնակցությունը կամ չմասնակցությունն ինքնիշխան և անկախ երկրի որոշումն է։ Բացի այդ, մինչև գագաթնաժողովը դեռ շատ բան կարող է փոխվել այս ամիսներին, հուսանք՝ դեպի լավը»,- ասել է գլխավոր քարտուղարը։
Նիկոլ Փաշինյանն ավելի վաղ հայտարարել էր, որ Հայաստանը սառեցրել է մասնակցությունը ՀԱՊԿ-ի աշխատանքներին։ Նիկոլ Փաշինյանը չմասնակցեց 2023 թվականի նոյեմբերին Մինսկում անցկացված ՀԱՊԿ գագաթնաժողովին։
