«Խոսեք, արտահայտվեք, որտեղ ուզում եք, բայց լուռ ու համր մի մնացեք». Վլադիմիր Մարտիրոսյան
Քաղաքագետ Վլադիմիր Մարտիրոսյանի ֆեյսբուքյան էջում գրում է.
«Խոսեք, արտահայտվեք, կիսվեք ձեր մտահոգութուններով որտեղ ուզում եք, բայց լուռ ու համր մի մնացեք:
Մեզ ամեն օր կերակրում են տեխնոլոգիայով, որի անունն է «անտարբերություն» և «հուսահատություն»: Անտարբերություն տեղի ունեցող արհավիրքի նկատմամբ, հուսահատություն անելանելիությունից և արդյունքում ադապտացում իրավիճակին: Դրա վրա ծախսվում են ահռելի ֆինանսական ռեսուրսներ և սուտն ու մանիպուլացիան այլևս ունեն պետական ինստիտուցիոնալ ապահովում: Եթե դուք չեք հավատում և վստահում ոչ իշխանությանը և ոչ էլ նրան ընդդիմացողներին, դուք դառնում եք անտարբեր քաղաքական գործընթացների նկատմամբ:
Հուսահատությունը բերում է նրան, որ ձևավորվում է բևեռային մտածողության մի ֆորմուլա, որտեղ այլևս ոչ ընդունելի և վստահելի են անցյալը, ոչ ներկան և ոչ էլ հնարավոր ապագան: Շատերը սկսում են օտարել իրենցից քաղաքական գործընթացի մեջ իրենց պատասխանատվությունը և դերակատարությունը, ինչի արդյունքում օտարում են իրենցից իրենց երկիրն ու հողը, հիշողությունն ու պատկանելիությունը: Արդյունքում քոնը դանդաղ դառնում է ուրիշինը:
Ճշմարտությունը մեկն է:
Մեր երկիրն ունի քաղաքականապես և բարոյապես պարալիզացված ղեկավար, ով փորձում է պարտվածի սինդրոմը կրել ոչ թե միայնակ, այլ այն բարդել բոլորիս վրա, զրկելով այդ սինդրոմից ազատվելու թեկուզ և փոքր շանսից, նույնիսկ շանտաժ անում չհանձնվելու դեպքում:
Ես պարտվածի սինդրոմով քաղաքական պարալիտիկներին մի ողջ երկրի և ժողովրդի գերեզմանափոր դառնալու հետ երբևէ չեմ համակերպվելու, ոչ էլ անտարբերությամբ հնարավորություն տալու:
Դա հաջողվելու է, ավելին բոլոր իշխանական նարատիվները հասարակության ակտիվ պրոտեստանտ զանգվածները վերջին շրջանում ինքնուրույն են սկսել ջախջախել, արգումենտացված և շատ արագ: Հասել են հայ մարդկանց համոզմունքները, տրադիցիան, հիշողությունը կերպը վտանգելուն ու փոխելուն: Այս իշխանության որևէ թեզ այս հասարակությունն այլևս չի մարսում և օտար մարմնի պես սկսել է վանել իրենից:
Հավատացեք դա գերկարևոր երևույթ է և յուրաքանչյուրի կարծիք, խոսք, անհամաձայնություն կոտրում և փոխում է իրավիճակը:
Հավատացեք, որ ներքին շրջանակներում որոշումների ընդունման և իրականացման առումով հնարավոր պրոտեստի հետ հաշվի են նստում այս երկրի, թե ներքին և թե արտաքին ախոյանները:
Այսպես կոչված Facebook-ից դուրս կյանքում պրոտեստն ու անհամաձայնությունը ավելի թափ է հավաքել: Այդ անհամաձայնությունը ստանում է ծավալ: Անհատական պրոտեստը նույնիսկ խոսքի ու կարծիքի մակարդակով աշխատող է և վարակիչ:
P.S. Անտարբերությունը չի շարունակելու այս արհավիրքի անխափան ընթացքը, եթե խոսեք, արտահայտվեք, ընդդիմանաք և դիմադրեք:Հասել են ձեր ուղեղներին, կերպին ու տներին: Արհավիրքի շարունակականությունը հնարավոր է միայն անտարբերության պայմաններում, կըդհատվի անտարբերությունը կկանգնի արհավիրքը: Խոսեք, արտահայտվեք, կիսվեք ձեր մտահոգութուններով որտեղ ուզում եք, բայց լուռ ու համր մի մնացեք»:
