Բորիս Ջոնսոնը 1 մլն դոլար է պահանջել Թաքեր Կառլսոնին հարցազրույց տալու համար
Ամերիկացի լրագրող Թաքեր Կառլսոնը պատմել է, որ Մեծ Բրիտանիայի նախկին վարչապետ Բորիս Ջոնսոնն իրենից մեկ միլիոն դոլար է ուզել Ուկրաինայի հակամարտության վերաբերյալ դիրքորոշումը պարզաբանող հարցազրույցի համար: Այս մասին հայտնում է ՌԻԱ Նովոստին։
Կառլսոնը Ջոնսոնին անվանել է «մարդ, որը 2022 թվականին ԱՄՆ կառավարության հանձնարարությամբ իր ձեռքով» է տորպեդահարել ռուս-ուկրաինական խաղաղ պայմանավորվածությունները և այդ պատճառով էլ պատասխանատվություն է կրում հարյուր հազարավոր մարդկանց մահվան համար։
Լրագրողը պատմել է, որ Ջոնսոնին հարցում է ուղարկել այն բանից հետո, երբ պաշտոնաթող քաղաքական գործիչն իրեն «Կրեմլի գործիք» է անվանել ՌԴ նախագահ Վլադիմիր Պուտինի հետ հարցազրույցի համար: Սկզբում, լրագրողի խոսքով, իրեն մերժել են, բայց հետո ֆինանսական պայմաններ են ներկայացրել։
Վերջիվերջո նրա խորհրդականներից մեկն ասել է․ «Նա ձեզ հետ կխոսի, բայց դա միլիոն դոլար կարժենա։ Նա մեկ միլիոն ԱՄՆ դոլար է ուզում՝ ոսկով կամ բիթքոինով»,-պատմել է Կառլսոնը Blaze պարբերականին տված հարցազրույցում։
«Ես հենց նոր հարցազրույց եմ արել Վլադիմիր Պուտինի հետ։ Ես Պուտինին չեմ պաշտպանում, բայց Պուտինն ինձանից մեկ միլիոն դոլար չի ուզել։ Այնպես որ, դուք ինձ ասում եք, որ Բորիս Ջոնսոնը շատ ավելի լպրծուն ու տհաճ տիպ է, քան Վլադիմիր Պուտինը, ինչն իրականում այդպես է»,- հավելել է նա։
Կառլսոնը խոսել է Ուկրաինային 60 մլրդ դոլարի լրացուցիչ օգնության մասին, որը քննարկվում է Վաշինգտոնում։ Այդ գումարը, ըստ նրա, թույլ չի տալիս հաղթել Ռուսաստանին և ուղղակի փողերի լվացման գործողություն է՝ բազմաթիվ մարդկանց մասնակցությամբ:
Ամփոփելով, նա նշել է՝ եթե շահույթ եք ստանում պատերազմից, ապա այդ առիթով Աստծո հետ եք գործ ունենալու, քանի որ դա իսկապես անբարոյականություն է։
