ԵՄ-ի և Չինաստանի միջև վստահությունը խաթարվել է. Բորել
ԵՄ արտաքին քաղաքականության պատասխանատու Ժոզեպ Բորելը ուրբաթ նախազգուշացրել է, որ դաշինքի և Չինաստանի միջև վստահությունը խաթարվել է՝ երկու երկրների միջև առևտրային անհավասարակշռության պատճառ համարելով Չինաստանում եվրոպական ընկերությունների առջև ծագած «դժվարությունները», գրում է AFP-ն։
Բորելը Չինաստան է ժամանել հինգշաբթի՝ իր ամենախոշոր առևտրային գործընկերոջ հետ դաշինքի հարաբերություններում «ռիսկերի վերացման» ռազմավարությունը կառավարելու և այս տարվա վերջին նախատեսված գագաթնաժողովի համար հիմք դնելու համար:
«Վստահությունը բոլոր մարդկային հարաբերությունների հիմքն է, և… ընդհանուր վստահությունը խաթարվել է», – ուրբաթ օրը Չինաստանի մայրաքաղաքում Պեկինի համալսարանի լսարանին է ասել Բորելը:
«Դա հրաշքով չի վերադառնա, – ավելացրել է նա:- Այն պետք է վերականգնվի»։
Նա ընդգծել է, որ դաշինքի և Չինաստանի միջև առևտրային անհավասարակշռությունը՝ 400 մլրդ եվրոն «ոչ միայն քանակական է, այլև որակական»։
«Իմ կարծիքով, մեր կարծիքով, պատճառը մշտական դժվարությունների մեջ է, որոնց բախվում են եվրոպական ընկերությունները, որոնք ցանկանում են մուտք գործել չինական շուկա», – ասել է Բորելը:
Բորելի ուղևորությունը, որն այս տարի երկու անգամ հետաձգվել էր և սպասվում է, որ կտևի մինչև շաբաթ, սկսվել է հինգշաբթի օրը Շանհայում՝ տնտեսական և բիզնես հարցերի շուրջ եվրոպական ընկերությունների հետ հանդիպումով, որը Բորելը նկարագրել է որպես «ոգեշնչող կարծիքների փոխանակում»:
