Կանանց աշխարհի առաջնությունը մեզ համար մի փուլ է Եվրոպական խաղերին նախապատրաստվելու համար. Ռաֆայել Մեհրաբյան
Հայաստանի բռնցքամարտի կանանց ընտրանին վերջին մարզումներն է անցկացնում աշխարհի առաջնությունից առաջ:
«Սա մեր վերջնական ուսումնամարզական հավաքն է աշխարհի առաջնությունից առաջ: Մեր պլանավորածի 80 տոկոսն ի կատար ենք ածել: Մինչև մրցումների մեկնարկն էլ այլ ծրագրով ենք մարզվելու»,-«Արմենպրես»-ի հետ զրույցում ասաց Հայաստանի հավաքականի գլխավոր մարզիչ Ռաֆայել Մեհրաբյանը:
Ազգային ընտրանին արդեն երրորդ հավաքն է անցկացնում ընթացիկ տարում: Մարզիչը շեշտեց, որ դեռևս պետք չէ ակնկալել, որ մարզիկները գերազանց մարզավիճակում կլինեն, բայց յուրաքանչյուր օր նրանք բարձրացնում են իրենց տեխնիկատակտիկական վարպետությունը:
«Բոլորը տրամադրված են լավ մասնակցելու աշխարհի այս առաջնությանը, սակայն ինձ համար առավել կարևոր տեղ ունեն Եվրոպական խաղերը, որը Փարիզի Օլիմպիական խաղերի քվոտա է տալիս: Աշխարհի առաջնությունը մեզ համար մի փուլ է Եվրոպական խաղերին նախապատրաստվելու համար»,-ասաց մասնագետը:
Մեհրաբյանի խոսքով` մարզչական շտաբի համար առաջնահերթը Եվրոպական խաղերն են և դրանց նախապատրաստական շրջանը:
Բռնցքամարտի կանանց աշխարհի առաջնությունը կկայանա մարտի 15-26-ը Հնդկաստանի մայրաքաղաք Նյու Դելիում:
