Ադրբեջանի նկատմամբ ճնշումը բավարար չէ. Արցախը դեռեւս շրջափակման մեջ է. Բեգլարյան․ News.am
Միանշանակ կարող ենք ասել, որ ճնշումները, որոնց ենթարկվում է Ադրբեջանը, դեռեւս բավարար չեն, քանի որ Արցախը դեռեւս շրջափակման մեջ է, եւ 120 հազար մարդ շարունակում է մնալ պատանդի կարգավիճակում։ Այս մասին NEWS.am-ի թղթակցի հետ զրույցում ասաց Արցախի պետական նախարարի խորհրդական Արտակ Բեգլարյանը։
Ըստ Արցախի պետնախարարի խորհրդականի՝ գործողություններին ու նստացույցին միջազգային հանրության արձագանքը պետք է դիտարկել երկու տեսանկյունից՝ ուղղակի եւ անուղղակի։
«Երբեմն շատ դժվար է գնահատել, թե որոնք են գործողությունները եւ ինչ սուբյեկտների եւ խաղացողների վրա են ազդում փոխադարձաբար:
Ամեն դեպքում, մենք հնարավորություն ունեցանք անմիջականորեն շփվելու ՄԱԿ-ի հայաստանյան գրասենյակի ղեկավարի, ինչպես նաեւ մեր որոշ միջազգային գործընկերների, այսինքն՝ Արցախի ընկերների, պատգամավորների հետ։ Անուղղակիորեն հնչում են տարբեր հայտարարություններ, որոնք եւ՛ ՀՀ արտաքին գործերի նախարարության դիվանագիտական ջանքերի արդյունք են, եւ՛ կարող են լինել Արցախի կառավարության եւ բարեկամների, ինչպես նաեւ սփյուռքի մեր գործընկերների, հայրենակիցների ճնշումների հետեւանք։ Եվ ամեն ինչ, ընդհանուր առմամբ, բերում է այս արդյունքներին, այս իրավիճակին։ Սակայն միանշանակ կարող ենք ասել, որ ճնշումները, որոնց ենթարկվում է Ադրբեջանը, դեռեւս բավարար չեն, քանի որ Արցախը դեռեւս շրջափակման մեջ է, եւ 120 հազար մարդ շարունակում է մնալ պատանդի կարգավիճակում։ Ուստի անհրաժեշտ է հնարավորինս մեծացնել ճնշումը մեր կողմից միջազգային հանրության, իսկ միջազգային հանրության կողմից՝ ադրբեջանական կողմի վրա»,- ընդգծեց Բեգլարյանը։
Նրա խոսքով, իհարկե, Արցախի եւ Հայաստանի կառավարությունները պետք է օգտագործեն հնարավոր բոլոր լծակները, որպեսզի ուղղակիորեն ազդեն Ադրբեջանի գործողությունների վրա։
«Մենք նախատեսում ենք տարբեր փոքր ակցիաներ իրականացնել, համագործակցում ենք նաեւ այլ կազմակերպված խմբերի, կազմակերպությունների հետ, որոնք նույնպես բողոքի ակցիաներ են անցկացնում կամ որոշակի անտեսանելի լոբբիստական եւ տեղեկատվական աշխատանքներ են տանում, որպեսզի կարողանանք միավորել ուժերը, ավելի համախմբել մեր ունեցած ողջ ներուժը։
Ավելի լայնածավալ եւ կոշտ գործողություններ դեռեւս նախատեսված չեն։
Իրավիճակի եւ հնարավորությունների համաձայն՝ լրացուցիչ աշխատանքներ կիրականացնենք»,- ասաց Արցախի պետնախարարի խորհրդականը։
Արտակ Բեգլարյանն իր կարծիքն է հայտնել նաեւ ՀՀ կառավարության շենքի մոտ ակցիաներ անցկացնելու ընդդիմության կոչերի մասին։
«Երբ ես այստեղ նստացույց հրավիրեցի, հիմնավորեցի, թե ինչու եմ այստեղ, եւ նաեւ նշեցի, որ դա չի նշանակում, որ պետք չէ ճնշում գործադրել կամ աշխատել մյուս բոլոր խաղացողների վրա՝ թե՛ ներքին, թե՛ արտաքին:
Բնականաբար, յուրաքանչյուր մարդ, յուրաքանչյուր խումբ, յուրաքանչյուր սուբյեկտ ինքն է որոշում, թե ով է լինելու իր գործողությունների հասցեատերը։ Եվ կարծում եմ, որ, հաշվի առնելով իմ կարգավիճակը, եւ ոչ միայն իմ, այլ նաեւ մեր գործընկերների՝ ընդդիմադիր պատգամավորների կոչը, կասկածը տեղին չէ, քանի որ նրանք ընդդիմադիր են, իսկ ես ներկայացնում եմ իշխանությունը: Եւ հաշվի առնելով նաեւ մեր փորձն ու մարդու իրավունքների պաշտպանի ներկայությունը այս նստացույցի ընթացքում, ինչպես նաեւ նախկին իրավապաշտպանների աջակցությունն ու մասնակցությունը, կարծում եմ, որ մենք ճիշտ հասցեատեր ենք ընտրել՝ համապատասխան մեր փորձին եւ կարգավիճակին»,- ասաց Արցախի պետնախարարի խորհրդականը։
