Մարտակերտում բացվել է 12-րդ «Արմաթն օդում» ԱԹՍ կրթական աշխատանոցը

Նոյեմբերի 12-ին Արցախի Մարտակերտ քաղաքում բացվեց 12-րդ «Արմաթն օդում» ԱԹՍ կրթական աշխատանոցը՝ Առաջատար տեխնոլոգիաների ձեռնարկությունների միության (ԱՏՁՄ), Ֆրանսիայի Սարսել քաղաքի և Սարսելի հայկական մշակութային միության ջանքերով։

Ներկա էին Արցախի պետնախարարի խորհրդական Արտակ Բեգլարյանը, ԱՏՁՄ գործադիր տնօրեն Հայկ Չոբանյանը, ԱԺ ԿԳՄՍ նախարար Անահիտ Հակոբյանը, ԱԺ պատգամավորներ, փոխնախարարներ, ԱՏՁՄ ներկայացուցիչներ, այլ հյուրեր։

Մեկ օր անց՝ նոյեմբերի 13-ին Ստեփանակերտի Ֆրանկոֆոնիայի կենտրոնում՝ ԱՏՁՄ-ի, Արցախի կառավարության, «Համազգային հայ կրթական և մշակութային Արցախ» կենտրոնի, «Արցախին օգնության մարմին» հիմնադրամի և Արցախի Ֆրանկոֆոնիայի կենտրոնի համագործակցությամբ տեղի ունեցավ Արցախի «Արմաթ» ճարտարագիտական աշխատանոցների մարզային ցուցահանդեսը, որին մասնակցեցին Արցախի 24 «Արմաթ» աշխատանոցներ։ Բացմանը ներկա էին Արտակ Բեգլարյանը, Հայկ Չոբանյանը, Արցախի տարածքային կառավարման նախարարության ներկայացուցիչներ, ԱԺ պատգամավորներ, ԱՏՁՄ անդամ ընկերությունների ներկայացուցիչներ, այլ հյուրեր։ Ցուցահանդեսի ընթացքում ներկայացվեցին արմաթցիների՝ եռաչափ տպիչով և փայտամշակման հաստոցով պատրաստված աշխատանքները, «Աղուես» ու «Կրիայ» ծրագրերով ստեղծված խաղերը և մի շարք ավտոմատացված և խելացի համակարգեր։

Ցուցահանդեսին զուգահեռ տեղի ունեցավ սև գծին հետևող ռոբոտների մրցույթը, որտեղ հաղթող ճանաչվեց Ասկերանի միջնակարգ դպրոցի «Արմաթ» ճարտարագիտական աշխատանոցը։ Մրցանակային տեղեր զբաղեցրեցին նաև Սոսի և Նորշենի միջնակարգ դպրոցների «Արմաթ» աշխատանոցները։

Նշենք, որ այս պահին Արցախում գործում են 24 «Արմաթ» ճարտարագիտական և 2 «Արմաթն օդում» ԱԹՍ կրթական աշխատանոցներ։