«Եզրույթը, թե Արցախի մեծ մասը կորցրել ենք՝ ճիշտ եզրույթ չէ». Հովիկ Աղազարյան
ԱԺ «Իմ քայլը» խմբակցության պատգամավոր Հովիկ Աղազարյանն այսօր խորհրդարանում լրագրողների հետ ճեպազրույցում անդրադարձավ ՀՀ երրորդ նախագահ Սերժ Սարգսյանի հարցազրույցին՝ նշելով, թե Սերժ Սարգսյանի այն հայտարարությունը, որ 2018 թվականի հեղափոխությունը հակաղարաբաղյան էր, իր համար սահմռկեցուցիչ արտահայտություն է։
«Ինձ համար դա սահմռկեցուցիչ նախադասություն էր, հետաքրքիր է, ինքն ինչի՞ հիման վրա այդ հայտարարությունն արեց»,- նշեց պատգամավորը։
168.am–ի դիտարկմանը, որ իրենց՝ ներկայիս իշխանության օրոք Հայաստանը կորցրել է Արցախի մեծ մասը, հետևաբար՝ Սերժ Սարգսյանն այդ կոնտեքստում է նաև նման բան ասել, Հովիկ Աղազարյանն ասաց, թե այդ եզրույթը՝ Արցախի մեծ մասը կորցնելու մասով, ճիշտ եզրույթ չէ։
«Մեծ մաս ասելով՝ նկատի ունեք Ջաբրայիլը, այն ազատագրված տարածքները, որոնք ծառայում էին՝ որպես Արցախի անվտանգության գոտի, որոնք պետք է հետ վերադարձնեին Արցախի կարգավիճակի դիմաց։ Առավել ևս, որ Սերժ Սարգսյանն այդ շրջաններից մեկի՝ Աղդամի հետ կապված ասել էր, որ այն մեր հայրենիքը չէ։ Հետևաբար՝ եզրույթը, թե Արցախի մեծ մասը կորցրել ենք՝ ճիշտ եզրույթ չէ։ Դուք նկատի ունեք այն, որ այն մեծ մասից մնացել է 30 տոկոսը։ Այո, իմ Արցախն այսօր հոշոտված է, և այդ վերքերը մենք պետք է կամաց-կամաց բուժենք»,- ասաց Հ. Աղազարյանը։
Հարցին՝ ո՞ւմ մեղքով է Արցախը հոշոտվել, Հովիկ Աղազարյանը պատասխանեց. «Առաջին հերթին՝ իմ մեղքով, հետո՝ մյուսների մեղքով, ովքեր մասնակցություն են ունեցել այդ ամբողջ գործընթացին այս 30 տարվա ընթացքում։ Ես դեմ չեմ, որ յուրաքանչյուրիս մեղքի բաժինը չափեն, տեսնեն՝ ով ինչքան մեղավորություն ունի այսօրվա Արցախի հոշոտված վիճակի հետ կապված, դա ժամանակի ընթացքում կճշտվի, և ժամանակի ընթացքում շատ բան կճշտվի»։
Մեր հաջորդ հարցին՝ ԼՀԿ ղեկավար Էդմոն Մարուքյանն առաջարկում է ստեղծել ԱԺ քննիչ հանձնաժողով՝ պատերազմի հանգամանքները քննելու համար, ինչո՞ւ է իշխանությունը մերժում, եթե այդքան շատ է ցանկանում բոլորի մեղքի բաժինը չափել, Հովիկ Աղազարյանը պատասխանեց, որ իշխանությունը չի մերժում, այլ ասում է՝ կա օրենքով նախատեսված հնարավորություն։
«Էդմոն Մարուքյանն այս լարված իրավիճակում այլ ձևաչափ է առաջարկում, կա ստանդարտ ձևաչափ, բայց այդ ձևաչափով չի ուզում առաջնորդվել։ Նույն Էդմոն Մարուքյանը, ի դեպ, իմ կողմից շատ հարգված, ասում է՝ թող վարչապետը հրաժարական տա, հետո գնանք կայունացման։ Այդ ամենը մեզ համար ընդունելի չէ»,- շեշտեց նա։
Հարցին՝ իշխանական պատգամավոր Անուշ Բեղլոյանը նշում է, որ Հայաստանը 30 տարի բանակ չի ունեցել, 30 տարի Հայաստանը բանակ ունեցե՞լ է, պատգամավորը պատասխանեց՝ ինչպե՞ս կարող է ասել, թե բանակ չենք ունեցել։
«Կարող ենք ասել, որ բանակ ունեցել ենք այս կամ այն թերություններով, բայց ո՞նց կարող ենք ասել, որ բանակ չենք ունեցել, ունեցել ենք բանակ, Պաշտպանության նախարար, Գլխավոր շտաբի պետ։ Ամեն ինչ շատ լավ է եղել որոշակի ժամանակահատվածում, բայց հետո ըստ երևույթին սխալներ են թույլ տվել։ Առիթից օգտվելով՝ ուզում եմ ասել, որ հիմա ես, իմ ընկերների հետ, ուզում ենք կյանքի կոչել այն թեզը, որ մենք պետք է անցնենք ազգ-բանակ սկզբունքին, հայրենիքը պետք է լինի յուրաքանչյուրինը»,- նշեց նա։
Դիտարկմանը՝ այդ դեպքում ինչո՞ւ հրաժարվեցին ազգ-բանակ կոնցեպտից, որը կար նախկինում, Հովիկ Աղազարյանը հարցով պատասխանեց՝ ո՞վ է հրաժարվել, ե՞րբ է եղել։
Ստիպված պատգամավորին հիշեցրինք, որ այդ կոնցեպտը ներդրել էր Պաշտպանության նախկին նախարար Վիգեն Սարգսյանը, սակայն այսօրվա իշխանությունները դրանից հրաժարվեցին, Հովիկ Աղազարյանն ասաց, որ ազգ-բանակ սկզբունքի մասին երազել է գիտակից կյանքում և այսօր հնարավորություն ունի կյանքի կոչելու։
«Վիգեն Սարգսյանն առաջ է քաշել ազգ-բանակ կոնցե՞պտը, չէ, իրենը ուրիշ բան է եղել, ճիշտն ասած, ես չգիտեմ, գուցե այդ ժամանակ ես այստեղ չեմ եղել»,- եզրափակեց նա։
Մանրամասները՝ 168.am-ի տեսանյութում
