Նորվեգիայում ավելի քան 100 բնակելի տուն է ոչնչացել հրդեհի ճիրաններում
Նորվեգիայում հարավում հուլիսի 17-ին բռնկված հրդեհի հետևանքով Դրամեն համայնքի Կրոկստադելվա ավանում ամբողջությամբ այրվել է 100-ից ավելի տուն։ Այս մասին հայտնում է երկրի NRK հանրային հեռարձակողը։
Հրդեհը բռնկվել է տներից մեկում և տարածվել հարևան կառույցների վրա, նաև մոտակա անտառում։ Ոստիկանության տվյալներով՝ դեպքի վայրում լսվել են պայթյուններ։
Տուժել է առնվազն երեք մարդ, այդ թվում՝ մեկ հրշեջ։ Ութ ոստիկան ծխահարվել է։ Հիվանդանոց է տեղափոխվել ծխի պատճառով շնչառական խնդիրների բախված երկու անձ։ Իշխանությունները հասցրել են տարհանել հարյուրավոր բնակիչների։ Զոհերի և անհետ կորածների մասին չի հաղորդվում։
Վեստֆոլդի միջհամայնքային հրշեջ ծառայության ղեկավար Յան Հելգե Կայսերի խոսքով՝ հրդեհը մեկուսացվել է, բայց բնակելի գոտում և անտառում հրդեհաշիջման աշխատանքները կշարունակվեն ամբողջ օրվա ընթացքում։ Աշխատանքներին ներգրավված է 10 հրշեջ հաշվարկ։
NRK-ի հաղորդմամբ՝ գիշերը հրդեհամարման աշխատանքները դադարեցվել են ամպրոպի պատճառով։
Նորվեգական լրատվամիջոցների հաղորդմամբ՝ սա երկրում վերջին 100 տարիներին տեղի ունեցած ամենաուժեղ հրդեհն է։
