Լիբանանը պատրաստ է բանակը տեղակայել Իսրայելի հետ սահմանին
Լիբանանը մտադիր է իր զինված ուժերը տեղակայել Իսրայելի հետ միջազգայնորեն ճանաչված ամբողջ սահմանի երկայնքով։ Դրա մասին Բեյրութում ԱՄՆ զինված ուժերի Կենտրոնական հրամանատարության (CENTCOM) ղեկավար, ծովակալ Բրեդ Քուպերի հետ հանդիպմանն հայտարարել է երկրի նախագահ, գեներալ Ջոզեֆ Աունը։
Ըստ Աունի՝ Լիբանանի բանակը լի է վճռականությամբ՝ կատարելու առաջադրված խնդիրը, և Իսրայելը չպետք է խոչընդոտի սահմանին դրա տեղակայմանը։ Նրա հայտարարությունը հրապարակել է նախագահի մամուլի ծառայությունը X սոցիալական ցանցում։
Բանակցությունների ընթացքում քննարկվել է լիբանանա-իսրայելական խորհրդակցությունների արդյունքներով հունիսի 26-ին Վաշինգտոնում ստորագրված շրջանակային համաձայնագրի իրագործումը։ Ինչպես հայտնում է Asharq al-Awsat-ը, CENTCOM-ի ղեկավարը Բեյրութ է ժամանել Թել Ավիվից՝ ռազմական դիտորդների խմբի հետ միասին։
Պարբերականի տվյալներով՝ պայմանավորվածությունների շրջանակում իսրայելական ուժերը մոտ ժամանակներս պետք է լքեն Լիբանանի հարավի մի շարք բնակավայրեր, որից հետո դրանք կզբաղեցնեն լիբանանյան բանակի ստորաբաժանումները՝ այսպես կոչված «փորձնական գոտիներում»։
