ԱՄՆ-ն ու Իրանը հնարավոր է հանդիպում անցկացնեն Ժնևում հուշագրի ստորագրումից առաջ. Արաղչի
Իրանի արտգործնախարար Աբաս Արաղչին հայտարարել է, որ ուրբաթ Ժնևում հնարավոր է տեղի ունենա ԱՄՆ-ի և Իրանի պատվիրակությունների ղեկավարների հանդիպումը՝ նախքան հակամարտության կարգավորման վերաբերյալ փոխըմբռնման հուշագրի ստորագրումը։
Ըստ Իրանի գլխավոր դիվանագետի՝ փաստաթղթի հնարավոր ստորագրումից հետո նախատեսվում է կողմերի միջև հաջորդող բանակցությունների նոր փուլի մեկնարկը։
Արաղչին նշել է, որ համաձայնագիրը կարող է դրականորեն անդրադառնալ Իրանի տնտեսական իրավիճակի վրա, սակայն ընդգծել է, որ Թեհրանը չպետք է ամբողջությամբ հույսը դնի նման պայմանավորվածությունների վրա։
Ավելի վաղ ԱՄՆ-ի, Իրանի և որպես միջնորդ հանդես եկող Պակիստանի ներկայացուցիչները հաստատել էին հրադադարի մասին համաձայնության հասնելը, որի ստորագրումն ակնկալվում է հունիսի 19-ին Ժնևում։
