Լրագրողները չեն կարողանա առանց ուղեկցության տեղաշարժվել Պենտագոնում. АВС

Լրագրողներն այլևս չեն կարող ազատորեն տեղաշարժվել Պենտագոնի շենքերում առանց գերատեսչության աշխատակիցների ուղեկցության։ Այս մասին հայտնում է ABC News հեռուստաալիքը։

Ըստ հաղորդման՝ նման որոշում է կայացրել Կոլումբիայի շրջանի ԱՄՆ վերաքննիչ դատարանը։ Դատավորների կազմը ձայների երկու կողմ, մեկ դեմ հարաբերակցությամբ պաշտպանել է Պաշտպանության նախարարության գործողությունները՝ ուղղված մամուլի մուտքի սահմանափակմանը։

Դեռ մարտին Կոլումբիայի շրջանային դատարանը բավարարել էր The New York Times (NYT) պարբերականի հայցը։ Այդ ժամանակ նախարարությանը հրահանգվել էր վերականգնել թերթի յոթ թղթակիցների անցագրերը և չեղարկել 2025 թվականի հոկտեմբերին սահմանված հավատարմագրման սահմանափակումները։ Ի պատասխան դրա՝ Պենտագոնը կարգադրել է անհապաղ փակել լրատվամիջոցների ներկայացուցիչների համար նախատեսված աշխատանքային գոտին, որը երկար տարիներ գործում էր գերատեսչության կենտրոնակայանում։ Բացի այդ, ղեկավարությունն արգելել է լրագրողների մուտքն ու տեղաշարժը շենքի տարածքում՝ առանց հատուկ ուղեկցության։

2025 թվականի հոկտեմբերի 16-ին Associated Press-ը հայտնել է, որ տասնյակ լրագրողներ հանձնում են Պենտագոնի իրենց անցագրերը։ Այս քայլով նրանք բողոքում են այն սահմանափակումների դեմ, որոնք լրատվամիջոցների համար սահմանել է գերատեսչության ղեկավար Փիթ Հեգսեթը։ NYT-ն Հեգսեթի գործողություններն անվանել է «աննախադեպ թշնամական», քանի որ, պարբերականի պնդմամբ, նրա ղեկավարությամբ Պենտագոնն առաջատար լրատվամիջոցներին զրկել է աշխատանքային տարածքներից՝ դրանք տրամադրելով պահպանողական հրատարակություններին, սահմանափակել է թղթակիցների ազատ տեղաշարժը գերատեսչության միջանցքներում և սահմանել նոր խիստ կանոններ, որոնք կարող են հանգեցնել մամուլի քարտերի չեղարկման։