Տնական մեթոդներով երեխային մի՛ բուժեք. Քութեշը` հոդերի, երիկամի, սրտի, նշիկների վնասման պատճառ

«Գարնանն ու աշնանը շատ են քութեշով վարակվելու դեպքերը։ Սակայն վերջին տարիներին դեպքերը շատացել են, քանի  որ փակ տարածքում շատ են լինում, երեխաների դեպքում` առավել ևս։ Օդափոխությունը քիչ է կատարվում»,- 168.am-ի հետ զրույցում ասաց Ինֆեկցիոն հիվանդությունների ազգային կենտրոնի մանկական բաժնի վարիչ, բժիշկ-վարակաբան Անահիտ Առաքելյանը` ընդգծելով, որ  քութեշը սուր վարակիչ հիվանդություն է, որի հարուցիչը A խմբի բետտա հեմոլիտիկ ստրեպտակոկն է։

Նրա խոսքով՝ քութեշի հիմնական կլինիկական նշաններն են` բարձր ջերմությունը, մարմնի ցանը, թարախային անգինան։

«Ցանը սկզբում կարող է դիտվել մարմնի վերին հատվածում, ապա տարածվել։ Լինում է մանր կետային ցան, իսկ քիթ-շրթունքային հատվածը ցանից զերծ է լինում։ Երբ երեխային զննում ենք, մաշկը փշոտ է լինում` սագամաշկի նման, որը միայն քութեշին է բնորոշ։ Կարևոր ախտանշաններից է նաև թարախային անգինայի դրսևորումը։ Սկզբում լեզուն պատված է լինում սպիտակ փառով, և տակից լեզվի կարմիր կետիկները արտահայտված են լինում ու առաջին հայացքից հիշեցնում են մորու։ Երեխայի բկանցքն ալ կարմիր է լինում։ Նշիկների վրա կարող ենք տեսնել սպիտակադեղնավուն փառ։ Քանի որ թարախային անգինա է լինում, երեխաների մեծ մասը հրաժարվում է սննդից` ցավի պատճառով։ Այս դեպքում պետք է տալ գոլ, սառը սնունդ, ոչ տաք»,- մանրամասնեց վարակաբանը։

Անահիտ Առաքելյանն ընդգծեց` ճիշտ բուժում չիրականացնելու դեպքում  կարող է բարդություններ առաջանան, օրինակ` ազդի՝ երիկամների գործունեության վրա։ Կարող է լինել ռևմատիկ տենդ։

«Մեծ տարիքում, երբ հայտնաբերվում են ռևմատիկ հիվանդություններ` ռևմատոլոգներն ասում են, որ մանկական տարիքում չբուժված ստրեպտոկոկային վարակներն են այս տեսակ հիվանդությունների պատճառը։ Այսինքն՝ հակաբիոտիկներ չեն ստացել ու դա հանգեցրել է այլ բարդությունների։ Որպեսզի չլինի բարդություն` երեխային պետք է տալ նշանակված 10-օրյա հակաբիոտիկները։ Լինում են դեպքեր, երբ բարձր ջերմության դեպքում մայրիկները օշարակներ են տալիս երեխային, երբ ցան է լինում, մտածում են, որ օշարակից է, ու տալիս են հակաալերգիկ դեղորայք, հակաբիոտիկ ու տարիներ հետո երեխայի մոտ երիկամային, սրտային, ռևմատիկ խնդիրների ժամանակ սկսում են հետազոտել ու պատճառը դա է լինում։ Ի դեպ, քութեշին բնորոշ է սրտի ռիթմի խանգարումը, երբ սրտի աշխատանքը մի  փոքր դանդաղում է։ Բնորոշ է նաև պարանոցի հատվածում լիմֆատիկ հանգույցների մեծացումը։ Սա վերահսկելի և բուժելի է, ուղղակի պետք է հետևել մասնագետի խորհրդին։ Կարևորը՝ տնական մեթոդներով բուժում չանել։ Դեպքեր են եղել, որ փորձել են մաքրել կոկորդի թարախային փառը` վատացնելով երեխայի վիճակը։ Նշիկները փխրուն գեղձային օրգաններ են և դրանց լրացուցիչ դիմելիս կարող են լուրջ հետևանքներ ունենալ»,- նշեց վարակաբանը։