Պուտինին խնդրել են Պուգաչովային զրկել ժողովրդական արտիստի կոչումից
«Անվտանգության և կոռուպցիայի դեմ պայքարի դաշնային նախագիծ» հասարակական կազմակերպությունը միջնորդագիր է ուղարկել Ռուսաստանի նախագահ Վլադիմիր Պուտինին՝ պահանջելով զրկել Ալլա Պուգաչովային ժողովրդական արտիստի կոչումից: Այս մասին Абзац-ին հայտնել է հասարակական կազմակերպության ղեկավար Վիտալի Բորոդինը։
Փաստաթղթում նշվում է, որ նման նախաձեռնության պատճառը Ալլա Պուգաչովայի՝ իր բարձր կոչմանը ոչ արժանի վարքագիծն է։ Ակտիվիստների կարծիքով՝ Կատերինա Գորդեևային տված հարցազրույցում երգչուհու խոսքերն ու գործողությունները հարցեր են առաջացնում ինչպես պետական անվտանգության, այնպես էլ Ժողովրդական արտիստի կարգավիճակ ունեցողի բարոյական և քաղաքացիական պատասխանատվության տեսանկյունից։
«Հարցազրույցում Պուգաչովան ակնհայտ հարգանքով է խոսել Ջոխար Դուդաևի մասին, ով պաշտոնապես ճանաչվել է որպես Ռուսաստանի Դաշնության տարածքում ահաբեկչական գործունեության կազմակերպիչ։ Ալլա Բորիսովնան նաև թույլ է տվել իրեն հրապարակայնորեն քննադատել պետական մարմինները»,- նշվում է խնդրագրում։
Հասարակական կազմակերպության ղեկավարը չի բացառել, որ Դուդաևի մասին Պուգաչովայի խոսքերը կարող են հակասել Ռուսաստանի Դաշնության Քրեական օրենսգրքի 205.2 հոդվածին («Հրապարակային կոչեր ահաբեկչական գործունեություն իրականացնելու վերաբերյալ, ահաբեկչության հրապարակային արդարացում կամ ահաբեկչության քարոզչություն):
