«Հնարավոր է, որ Իրանը Հայաստանին որևէ նոր առաջարկի միջոցով փորձում է իր համար ապահովել գործուն երաշխիքներ». Հակոբ Բադալյան
Քաղաքական վերլուծաբան Հակոբ Բադալյանը տելեգրամյան իր ալիքում գրել է. «Իրանի նախագահ Մասուդ Փեզեշկիանի այցից առաջ հայ-իրանական հարաբերության մասին հոդված է հրապարակել Իրանի ԱԳ նախարար Աբաս Արաղչին: Այս հանգամանքը վկայում է, որ Թեհրանը էական նշանակություն է տալիս Փեզեշկիանի այցին: Ավելին, դատելով հոդվածում առկա մի ձեւակերպումից, հնարավոր է եզրակացնել կամ առնվազն ենթադրել, որ Փեզեշկիանի այցի ընթացքում, ըստ ամենայնի, Երեւանին կներկայացվի ինչ որ նոր գաղափար կամ առաջարկ, որը կբնորոշի հայ-իրանական հարաբերության նոր հարթություն:
Համենայն դեպս, Արաղչին իր հոդվածում, խոսելով հայ-իրանական հարաբերության կարեւորության մասին, անդրադառնում է «նոր գլուխ բացելու» հանգամանքին:
Եթե սա պարզապես պատկերավորություն չէ, իսկ դիվանագետը, թերեւս, ամենից զգայուն պետք է լինի բառերի ու ձեւակերպումների հարցում, ապա կարող ենք եզրակացնել, որ Իրանը թերեւս դիտարկում է Հայաստանի հետ հարաբերության մի նոր հարթություն:
Ընդ որում, բոլորովին բացառված չէ, որ այդ հանգամանքը կապված լինի Վաշինգտոնում օգոստոսի 8-ի իրադարձությունների հետ, այսինքն պայմանավորված լինի դրանով: Հնարավոր է, որ Իրանը Հայաստանին հնարավոր որեւէ նոր առաջարկի միջոցով փորձում է իր համար ապահովել գործուն երաշխիքներ, չբավարարվելով պաշտոնական Երեւանի բանավոր հավաստիացումներով, որ չկան Իրանի կարեւոր շահերը ոտնահարող համաձայնություններ»:
