Զրույցը շատ անկեղծ և բովանդակալից էր. Պուտինը՝ Թրամփի հետ բանակցությունների մասին
Զրույցը շատ անկեղծ էր, բովանդակալից, և սա մեզ մոտեցնում է անհրաժեշտ որոշումների կայացմանը։ Այս մասին ասել է Ռուսաստանի նախագահ Վլադիմիր Պուտինը՝ մեկնաբանելով իր ամերիկացի գործընկերոջ հետ Ալյասկայում կայացած բանակցությունները։
Կրեմլի մամուլի ծառայության հաղորդմամբ՝ ԱՄՆ-ից վերադառնալուց հետո Պուտինը խորհրդակցություն է անցկացրել ռուս-ամերիկյան բանակցությունների արդյունքների վերաբերյալ։ Ռուսաստանի նախագահն իր վարչակազմի, կառավարության, Պետական դումայի, նախարարությունների և գերատեսչությունների ներկայացուցիչներին տեղեկացրել է Անքորիջում կայացած հանդիպման արդյունքների մասին։
«Ուզում եմ անմիջապես նշել, որ այցը ժամանակին էր և շատ օգտակար։ Խոսեցինք մեր փոխգործակցության գրեթե բոլոր ոլորտների, բայց առաջին հերթին, իհարկե, ուկրաինական ճգնաժամի հնարավոր և արդարացի կարգավորման մասին։ Եվ, իհարկե, հնարավորություն ունեցանք խոսելու այս ճգնաժամի ծագման պատճառների մասին։ Հենց այս արմատական սկզբնապատճառների վերացումը պետք է հիմք հանդիսանա կարգավորման համար», – ասել է Ռուսաստանի առաջնորդը։
Նա փաստել է, որ Ռուսաստանի Դաշնությունը երկար ժամանակ այս մակարդակի ուղիղ բանակցություններ չի վարել։
«Կրկնեմ՝ հնարավորություն եղավ հանգիստ և մանրամասն մեկ անգամ ևս ներկայացնել մեր դիրքորոշումը։ Մենք, իհարկե, հարգում ենք ամերիկյան վարչակազմի կարծիքը, ըստ որի՝ անհրաժեշտ է ռազմական գործողություններն արագ դադարեցնել։ Դա նաև մեր նպատակն է, և կցանկանայինք անցնել բոլոր հարցերը խաղաղ ճանապարհով լուծելուն», – նշել է Պուտինը։
