Գիտնականները պարզել են, թե ինչպես է առաջացել ժամանակակից կարտոֆիլը
Ժամանակակից կարտոֆիլն առաջացել է վայրի կարտոֆիլի և լոլիկի բնական խաչասերման արդյունքում՝ մոտ ինը միլիոն տարի առաջ Հարավային Ամերիկայում, տեղեկանում ենք Cell գիտական հանդեսում հրապարակված միջազգային ուսումնասիրությունից:
Կարտոֆիլի՝ որպես աշխարհի ամենակարևոր գյուղատնտեսական մշակաբույսերից մեկի ծագումը երկար ժամանակ եղել է գիտնականների հանելուկը։ Արտաքուստ ժամանակակից կարտոֆիլը գրեթե նույնական է Չիլիում աճող Etuberosum կարտոֆիլի երեք տեսակներին, որոնց վրա, սակայն, պալարներ չեն առաջանում։ Ֆիլոգենետիկ վերլուծության համաձայն՝ կարտոֆիլը գենետիկորեն ավելի մոտ է լոլիկին։ Այս հակասությունը հարթելու համար գիտնականները վերլուծել են 450 մշակված և 56 վայրի կարտոֆիլի տեսակների գենոմ։
Պարզվել է, որ բոլոր տեսակները պարունակում են Etuberosum-ի և լոլիկի գենետիկական նյութի կայուն և հավասարակշռված խառնուրդ։ Սա թույլ է տալիս ենթադրել, որ ժամանակակից կարտոֆիլը ծագել է այս երկու բույսերի միջև հնագույն խաչասերման արդյունքում։
Չնայած Etuberosum-ը և լոլիկը տարբեր տեսակներ են, մոտ 14 միլիոն տարի առաջ նրանք ունեցել են ընդհանուր «նախահայր»։ Մոտ հինգ միլիոն տարի տարանջատված մնալուց հետո, դրանք կարողացել են բնական խաչասերման ճանապարհով հիմք դնել ամենավաղ կարտոֆիլի բուսատեսակներին:
