Փաշինյանը կաթողիկոսին փոխելու իրավունք չունի. քաղաքագետ Սեմյոն Բաղդասարով
Հայաստանի վարչապետ Նիկոլ Փաշինյանը կաթողիկոսին փոխելու իրավունք չունի երկու պատճառով: Ինչպես փոխանցում է Sputnik Արմենիան RT-ի հետ զրույցում այս մասին ասել է քաղաքագետ, Մերձավոր Արևելքի և Կենտրոնական Ասիայի երկրների հարցերով փորձագետ Սեմյոն Բաղդասարովը:
Փաշինյանը հուլիսի 23–ին հայտարարեց, որ «Վեհարանն ազատագրելու» շարժման անդամները պետք է համապատասխանեն որոշակի չափանիշների ու ինքը համապատասխանում է դրանց և կարող է առաջնորդել շարժումը։ Նա առաջարկեց Գարեգին Երկրորդին հեռացնելուց հետո կաթողիկոսական տեղապահ նշանակել բարեվարքությամբ աչքի ընկնող ամուսնացյալ քահանայի, իսկ կաթողիկոսական նոր ընտրությունների առաջ աշխարհաբար թարգմանել «Կանոնագիրք» հայոց»–ը։
«Հայաստանում աշխարհիկ և կրոնական իշխանությունները բաժանված են։ ՀՀ Սահմանադրության մեջ ասվում է, որ Հայ առաքելական եկեղեցին առանձնահատուկ դերակատարություն ունի հայ ժողովրդի մշակութային և հոգևոր կյանքում: Կաթողիկոսը ցմահ ընտրվում է եկեղեցու բարձրագույն մարմնի կողմից, որում ընդգրկված են բոլոր երկրներում գործող թեմերի ներկայացուցիչները։ Թե ինչ կապ ունի նա (Փաշինյանը. խմբ.) այդ գործընթացի հետ, ընդհանրապես հասկանալի չէ», – ասել է փորձագետը։
Քաղաքագետի կարծիքով՝ դա աներևակայելի բան է և անկարգություններ հրահրելու ակնհայտ ցանկություն, այս ամենի ֆոնին Փաշինյանը կարող է առավելագույնը հայտարարել, որ ընտրություններ չեն լինելու, իսկ նվազագույնը՝ պարզապես կալանավորի բոլոր ընդդիմադիր առաջնորդներին և ընտրությունների գնա, ըստ էության, առանց մրցակիցների։
Հիշեցնենք` ՀՀ վարչապետ Նիկոլ Փաշինյանը մայիսի 29-ին կառավարության նիստի ժամանակ քննադատեց եկեղեցիների վիճակը՝ անվանելով դրանք «չուլանացված և աղբով լի»։ Հունիսի 2–ին նա հայտարարեց` եթե պարզվի, որ Գարեգին Բ–ն իսկապես խախտել է կուսակրոնության ուխտը և զավակ ունի, նա չի կարող լինել Ամենայն հայոց կաթողիկոս։ Նա գրեթե ամեն օր գրառումներ է անում սոցցանցում` պահանջելով, որ կաթողիկոսը հեռանա։
Գարեգին Երկրորդը հունիսի 22-ին հայտարարեց, որ ՀՀ իշխանությունների սանձազերծած հակաեկեղեցական արշավը լրջագույն սպառնալիք է ազգային միաբանությանը, երկրի ներքին կայունությունն ու ուղիղ հարված հայոց պետականությանը:
Հունիսի 25-ի լույս 26-ի գիշերը կալանավորվեց «Սրբազան պայքար» շարժման առաջնորդ Բագրատ արքեպիսկոպոս Գալստանյանը («հեղաշրջման գործով»)։
Հունիսի 27-ին ՀՀ ազգային անվտանգության ծառայության հատուկջոկատայինները մտան Մայր աթոռ Սուրբ Էջմիածին՝ վեհարանի բակ՝ ձերբակալելու Շիրակի թեմի առաջնորդ Միքայել արքեպիսկոպոս Աջապահյանին, ապա հեռացան։ Աջապահյանն ինքը ներկայացավ ՔԿ։ Հունիսի 28-ին նա կալանավորվեց։ Նրա նկատմամբ քրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։
Փաշինյանը հուլիսի 8-ին հայտարարեց, որ պատրաստ է անձամբ առաջնորդել Մայր աթոռ սուրբ Էջմիածնի «ազատագրումը»` նշելով, որ «Միածնի իջման վայրը զավթված է հակաքրիստոս, շնաբարո, ապազգային, ապապետական մի խմբակի կողմից»։ Մինչ այդ նա գրել էր, որ Վաղարշապատ խոշորացված համայնքի որեւէ տարածք չի կարող իրավապահների գործունեության համար փակ լինել։
