Ֆրանսիան արգելել է արմատական իսրայելցի նախարար Իտամար Բեն-Գվիրի մուտք գործել իր տարածք
Ֆրանսիան շաբաթ օրը հայտարարել է, որ արգելել է Իսրայելի ազգային անվտանգության նախարար Իտամար Բեն-Գվիրի մուտքը երկիր։ Ինչպես հայտնում է Le Monde-ն, որոշումը կայացվել է այն բանից հետո, երբ նախարարը տեսանյութ է հրապարակել, որտեղ ծաղրում է Գազայի հատված ուղևորվող մարդասիրական օգնության նավատորմի վրա իսրայելցի զինվորների կողմից կալանավորված ակտիվիստներին։
«Այսօրվանից Իտամար Բեն-Գվիրի մուտքը Ֆրանսիայի տարածք արգելվում է՝ նավատորմի կազմում գտնվող Ֆրանսիայի և Եվրոպայի քաղաքացիների նկատմամբ նրա դատապարտելի գործողությունների պատճառով», — հայտարարել է Ֆրանսիայի արտաքին գործերի նախարար Ժան-Նոել Բարոն։
Նա հավելել է, որ Իտալիայի հետ համատեղ կոչ է անում Եվրամիության մակարդակով ևս պատժամիջոցներ սահմանել Բեն-Գվիրի դեմ։
Մուտքի արգելքը հաջորդել է չորեքշաբթի օրը Բեն-Գվիրի հրապարակած այն տեսանյութին, որտեղ երևում է նավատորմի օտարերկրացի ակտիվիստների հանդեպ դաժան վերաբերմունքը։ Վերջիններս Իսրայելի կողմից բերման են ենթարկվել միջազգային ջրերում և սպասել հարավային Աշդոդ նավահանգստում իրենց արտաքսմանը։
Տեսանյութում երևում է, թե ինչպես են տասնյակ ակտիվիստներ ստիպված ծնկի եկել՝ ճակատներով գետնին հպված և ձեռքերը կապված վիճակում։ «Բարի գալուստ Իսրայել» վերնագրով հոլովակում պատկերված է նաև, թե ինչպես է Բեն-Գվիրը ընդհատում ակտիվիստներին՝ ծածանելով Իսրայելի դրոշը։
Իսպանիան նույնպես կոչ է արել Եվրամիությանը պատժամիջոցներ կիրառել Բեն-Գվիրի դեմ, մինչդեռ Միացյալ Թագավորությունն այդ «սադրիչ տեսանյութի» պատճառով արտաքին գործերի նախարարություն է կանչել Մեծ Բրիտանիայում Իսրայելի բարձրաստիճան դիվանագետին։ Իսրայելի վարչապետ Բենիամին Նեթանյահուն հայտարարել է, որ ակտիվիստների նկատմամբ Բեն-Գվիրի վերաբերմունքը «չի համապատասխանում իսրայելական արժեքներին ու չափանիշներին»։
Ավելի վաղ Նեթանյահուն մարդասիրական օգնության այս առաքելությունն անվանել էր «չարամիտ դավադրություն», որի նպատակն է աջակցել ՀԱՄԱՍ-ին։
Ակտիվիստները Թուրքիայից ճանապարհ էին ընկել անցյալ շաբաթ՝ «Սումուդ» գլոբալ նավատորմի կազմում գտնվող շուրջ 50 նավերով։
