«Կա՛մ Ձեր ռուս գործընկերն է ստում, կա՛մ Դուք․ Մեզ հիմա փորձում եք խաբել»․ ջերմոցատերը՝ ՍԱՏՄ պաշտոնյային
ՍԱՏՄ Բուսասանիտարիայի վարչության պետ Արթուր Նիկոյանը քիչ առաջ մոտեցավ Զվարթնոց համայնքում բողոքի ակցիա իրականացնող ծաղկեգործներին։
«Եթե խոսքը ՌԴ արտահանման մասին է, ՌԴ-ն մեզ պաշտոնական գրություն է ուղարկել, որտեղ տեղեկացրել է, որ ս․թ․ հունիսի 27-ից արգելափակում է Հայաստանից ծաղիկների արտահանումը դեպի Ռուսաստան»,-ասաց նա։
Ծաղկեգործներն ասացին, որ ծանոթ չեն նման տեղեկատվության։
Արթուր Նիկոյանը նշեց, որ առաջնորդվում են պաշտոնական գրություններով, իսկ պաշտոնապես տեղեկացրել են, որ հունիսի 27-ից արգելում են․ «Բայց դա ունի նաև շարունակություն․ իրենք նաև նշել են, որ կարող են մատակարարել այն արտադրողները, որտեղ կիրականացվի համատեղ աուդիտ, և տվյալ վիդեո ինսպեկցիայի իրականացումից հետո այն կազմակերպություններին, որոնք իրենք կգտնեն, որ տվյալ ջերմոցն ու ծաղկային արտադրանքը համապատասխանում են իրենց պահանջներին, տվյալ արտադրողից կթույլատրեն, որպեսզի ներմուծվի ՌԴ։ Գրությունն ստանալուն պես անցել ենք այդ աշխատանքին․ մի ջերմատնային տնեսությունը տևում է 3-3,5 ժամ։ Այդ ընթացքում իրականացրել ենք թվով 12 տնտեսվարողների մոտ, որոնց 9-ի մասով ասացին՝ նորմալ է, կարող են արտահանել, բայց ասեմ, որ մենք իրենց նախօրոք ցանկը ներկայացրել էինք, դեռևս հունիսի 23-ին՝ մեր ջերմատնային տնետեսությունների, որոնք արտադրում են ծաղիկներ և ցանկություն ունեն արտահանել։ Դա մոտ 700-ին մոտիկ թիվ էր»։
Նա վստահեցրեց, որ ռուսական կողմին ամբողջական ցանկ են տվել, ինչից հետո, երբ տեսահսկողական աշխատանքներն սկսել են, մոտ 10 օրում իրականացվել է ընդամենը 12 արտադրավայրի տեսահսկողություն, բայց պարզ էր, որ այդպես առաջ գնալու դեպքում մինչև տարեվերջ չենք կարող բոլորին վերջացնել։
Նա վստահեցրեց նաև, որ երրորդ երկրի ծաղիկ չի մտել Հայաստան, ապա հայկականի անվան տակ արտահանվել, ինչին ի պատասխան՝ ջերմոցատերն ասաց․ «Ներողություն եմ խնդրում, բայց կա՛մ ձեր ռուս կոլեգան է սուտ խոսում, կա՛մ դուք, որովհետև ասում են՝ անհայտ ծագման ծաղիկ է գնացել»։
Պատասխանատու պաշտոնյան հորդորեց ներմուծված ծաղիկների վերաբերյալ դիմել ՊԵԿ։
Ջերմոցատերը նկատեց՝ երրորդ երկրից ոջլոտ ապրանք է մտել, որի պատճառով մենք ենք տուժում․ «Հիմա, տեսախցիկների առաջ փորձում եք մեր գլխի տակ փափուկ բարձ դնել, խաբում եք։ Հիմա, համատարած չենք կարողանում ֆիտո ստանանք, 8 հոգի ընտրյալ է ստացել ամեն մեկի ջերմոցը 200 մլն դոլար արժի, ստեղ կանգնածների ջերմոցները ոչ մի թուղթ չունի»։
Ջերմոցատերը պնդեց, որ անձամբ մարդ գիտի, որ Իրանից ծաղիկ է բերում, արտահանում ՌԴ։
Մանրամասները՝ տեսանյութում
