Փորձում են վախի մթնոլորտ տարածել․ Մեհդի Սոբհանին` ՀՀ-ում ԱՄՆ դեսպանատան հայտարարության մասին
«Ամերիկացիները հմուտ ստախոսներ են»,-այս մասին այսօր հրավիրած մամուլի ասուլիսում հայտարարեց ՀՀ-ում ԻԻՀ դեսպան Մեհդի Սոբհանին, անդրադառնալով ՀՀ-ում ԱՄՆ դեսպանատան տարածած հաղորդագրությանը։
Դեսպան Սոբհանին ասաց, որ այդ հայտարարությունը չի տեսել։ Սակայն, ըստ դեսպանի, կասկած չկա, որ եվրոպացիները փորձում են մթնոլորտը սրել Իրանի, իրանցիների և Իրանի հետ հարաբերությունների նկատմամբ։
«Ամերիկացիները շատ հմուտ ստախոսներ են և փորձում են, նմանատիպ մթնոլորտ ստեղծելով, լարվածություն առաջացնել։ Խորհուրդ կտամ ուշադրություն չդարձնեք այն կասկածներին, որ փորձում են առաջացնել իրանցիների, ՀՀ քաղաքացիների շրջանում, ինչպես նաև խաթարել Հայաստան-Իրան հարաբերությունների վերաբերյալ տարածվող տեղեկությունները։ Միգուցե ցանկանում են, որպեսզի չգաք դեսպանություն և չլսեք մեր խոսքերը, նրանք վախենում են ժողովրդի և մեզ հետ կապերից, շփումներից»,- պարզաբանեց դեսպան Սոբհանին։
