Իսրայելի հասցրած հարվածների հետևանքով մեկ օրում Գազայում զոհվել է 25 մարդ

Գազայի հատվածի տարբեր շրջաններին հունիսի 7-ի առավոտյան իսրայելական զինուժի հասցրած հարվածների հետևանքով զոհվել է 25 մարդ:

Այս մասին հայտնել է Al Jazeera հեռուստաալիքը՝ վկայակոչելով պաղեստինյան բժշկական աղբյուրներին։

Նշվում է, որ 12 մարդ զոհվել է, ավելի քան 40-ը տուժել են հատվածի հարավում՝ Խան Յունիս քաղաքի շրջանում գտնվող տեղահանված անձանց վրաններին հարվածների հետևանքով, ևս 7 անձ դարձել է Գազա քաղաքում փախստականներով բնակեցված շենքին հասցրած հարվածի զոհ:

Եվս 6 հոգի զոհվել է հարավային Ռաֆահ քաղաքի մոտ գործող մարդասիրական օգնության բաշխման կենտրոնի առջև հավաքված մարդկանց ուղղությամբ իսրայելական զինվորականների բացած կրակի հետևանքով:

Գազայի հատվածի առողջապահության նախարարության ներկայացրած վիճակագրության համաձայն՝ մարտի 18-ից Իսրայելի կողմից հրետակոծությունների վերսկսման պահից այստեղ զոհվել է ավելի քան 4400 մարդ, տուժել՝ շուրջ 13.4 հազարը:

Մարտի 18-ի գիշերը Իսրայելի պաշտպանության բանակը վերսկսել էր հարվածները Գազայի հատվածին այն բանից հետո, երբ պաղեստինյան ՀԱՄԱՍ շարժման ներկայացուցիչները հրաժարվել էին ընդունել հրադադարի երկարաձգման և պատանդներին ազատ արձակելու ամերիկյան ծրագիրը։