Խորվաթիայի ոստիկանությունը կռվից հետո ձերբակալել է ավելի քան 140 ֆուտբոլային երկրպագուի, կան վիրավորներ
Խորվաթիայի ոստիկանությունը շաբաթ օրը ավելի քան 140 մարդու է ձերբակալել երկրպագուների մրցակից խմբերի միջև տեղի ունեցած կռվից հետո, որի հետևանքով մի քանի մարդ վիրավորվել է, հաղորդում է Associated Press-ը։
Խորվաթական լրատվամիջոցները հաղորդել են, որ Սպլիտի ափամերձ քաղաքում տեղի ունեցած կռիվը պլանավորված էր «Դինամո Զագրեբ»-ի և «Հայդուկ Սպլիտ»-ի միջև խաղից առաջ։ Ոստիկանությունը հայտարարել է, որ արագ արձագանքել է և կանխել հետագա բախումները՝ ձերբակալելով 146 մարդու, որոնց կարող է քրեական մեղադրանք առաջադրվել։
Բժիշկների խոսքով՝ վիրավորվել է չորս երկրպագու, որոնցից երկուսը ծանր վիճակում են, ինչպես նաև մեկ ոստիկան։
Խորվաթիայի վարչապետ Անդրեյ Պլենկովիչն ասել է, որ կռիվը «վատ օրինակ է ծառայել երիտասարդների համար և որևէ կապ չունի ո՛չ Հայդուկի, ո՛չ էլ Դինամոյի հետ»։
Երկու ակումբները Խորվաթիայում գլխավոր մրցակիցներ են, և նրանց երկրպագուների միջև բախումների մասին պարբերաբար հաղորդագրություններ են հայտնվում խաղերից առաջ։
