ՔՊ-ն քաղաքապետ չի ունենալու. ընդդիմության մեջ լարված չենք. համաձայնության կգանք. Մարտուն Գրիգորյան
«Մեր քաղաքը» դաշինքի Գյումրու քաղաքապետի թեկնածու Մարտուն Գրիգորյանը 31/51 ընտրատեղամասում կատարեց իր քվեարկությունը։
«Հուսանք, որ ամեն ինչ նորմալ կլինի։
Մինչ այս, բոլոր լրատվամիջոցները և քաղաքական ուժերը կանխատեսում էին, որ Գյումրիում պետք է լարվածություն լինի, թշնամական հարաբերություններ լինեն։ Տեսանք, որ ընդդիմադիր թեկնածուների միջև ոչ մի լարվածություն չկա։
Այն լարվածությունը, որ եղավ ու շարունակվում է, միայն «Քաղաքացիական պայմանագիր» կուսակցության կողմից է»,-քվեարկությունից հետո լրագրողների հետ զրույցում ասաց Մարտուն Գրիգորյանը։
Նա կրկին նշեց, որ ընտրությունների արդյունքում կոալիցիա կազմելուն կողմ չի։
«Իսկ համագործակցությանը միանշանակ կողմ եմ, ինչպես կարող եմ կողմ չլինել, եթե 50+ ձայն չկարողացանք հավաքել՝ ո՞նց ենք քաղաքապետի պաշտոնը վերցնելու։ Այն, որ ՔՊ-ն քաղաքապետ չի ունենալու՝ հաստատ է։ Գյումրեցիներն այսօր կհաստատեն այդ մասին։
Ինչ վերաբերում է ընդդիմադիրներին, կարծում եմ, որ այդ հարցի շուրջ համաձայնության կգանք և այնպես կանենք, որ Գյումրիում ՔՊ-ն իշխանություն չլինի»,- ասաց Մարտուն Գրիգորյանը։
Իսկ ինչ վեաբերում է քաղաքապետի թեկնածու Վարդան Ղուկասյանի հետ իր հարաբերություններին, Մարտուն Գրիգորյանն ասաց, որ 2006 թվականից նրա հետ որևէ առնչություն չի ունեցել։
