ԱՄՆ-ում կարծում են, որ ԵՄ-ն պետք է մասնակցի Ուկրաինայի շուրջ հաշտության համաձայնագրի հասնելուն. աղբյուր
Վաշինգտոնում այն կարծիքին են, որ Եվրամիությունն այսպես թե այնպես ներգրավվելու է ուկրաինական հակամարտության դադարեցման գործարքի կնքմանը, քանի որ համաձայնագրի շրջանակներում Մոսկվան կարող է պահանջել ԵՄ-ի կողմից Ռուսաստանի դեմ սահմանված պատժամիջոցների մեղմացում: Այս մասին հայտնել է Bloomberg գործակալությունը՝ հղում անելով իր աղբյուրներին:
«ԱՄՆ-ի պաշտոնատար անձինք իրենց եվրոպացի գործընկերներին ասել են, որ ԵՄ-ն պետք է մասնակցի Ուկրաինայի վերաբերյալ հաշտության ցանկացած համաձայնագրի, քանի որ Ռուսաստանը գործարքի շրջանակներում ցանկանում է դաշինքի կողմից սահմանված պատժամիջոցների մեղմացում»,- գրում է գործակալությունը։
ԱՄՆ-ն եվրոպացի գործընկերներին նաև տեղեկացրել է, որ առաջնահերթ խնդիրը մարտերի դադարեցումն է, իսկ դրանից հետո այնպիսի հարցերի քննարկումը, ինչպիսիք են Ուկրաինայի համար անվտանգության հնարավոր երաշխիքները։
