Այգավան գյուղի բենզալցակայանում պայթյունի հետևանքով տուժած երեք քաղաքացիներից երկուսը վերակենդանացման բաժանմունքում են
Արարատի մարզի Այգավան գյուղի մոտակայքում գտնվող բենզալցակայանում մարտի 4-ին տեղի ունեցած պայթյունի հետևանքով տուժած երեք քաղաքացի հոսպիտալացվել է:
Ինչպես հայտնում են ՀՀ առողջապահության նախարարությունից, նրանցից երկուսի առողջական վիճակը բժիշկները գնահատում են ծայրահեղ ծանր, նրանք գտնվում են վերակենդանացման բաժանմունքում:
Մյուս տուժածի առողջական վիճակը նախնական գնահատվում է ծանր, գտնվում է հետազոտման փուլում:
ՀՀ ներքին գործերի նախարարության փրկարար ծառայության տեղեկացմամբ՝ մարտի 4-ին, ժամը 16։39-ին Արարատի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Այգավան գյուղի մոտակայքում՝ բենզալցակայանում, տեղի է ունեցել պայթյուն։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատների չորս մարտական հաշվարկ։
Ըստ նախնական տվյալների՝ պայթել է հեղուկ գազի գլանատակառը (մոտ 25 տոննա)․ կա երկու տուժած։
