Երուսաղեմի Հայոց պատրիարքության սեփականությունը կարող է բռնագրավվել․ պատրիարքը դիմել է Իսրայելի վարչապետին
Երուսաղեմի Հայոց պատրիարքության դիվանապետ Տ. Աղան Աբեղա Գոգչյանը տեղեկացրել է, որ Երուսաղեմի պատրիարք Ամեն. Տ. Նուրհան արք. Մանուկյանը նամակ է գրել Իսրայելի վարչապետ Բենյամին Նեթանյահուին արնոնայի (հարկային պարտքերի) հարցով: Նշվում է, որ նամակում պատրիարք հայրը հորդորել է վարչապետին միջամտել և դադարեցնել պատրիարքության դեմ ձեռնարկած քաղաքապետարանի գործողությունները և վերսկսել իր կողմից նշանակված կառավարական հանձնախմբի հանդիպումները՝ խնդրին լուծում գտնելու համար:
«Երուսաղեմի Հայոց պատրիարքության սեփականությանը սպառնում է մոտալուտ բռնագրավում՝ իր պատմական գույքի վերաբերյալ վիճելի համայնքային հարկային պարտքի պատճառով, որը, կառավարության պնդմամբ, գոյացել է 1994 թվականից: Եթե 2025 թվականի փետրվարի 24-ին դատարանը մերժի Պատրիարքարանի բողոքը, քաղաքապետարանը կբռնագրավի և աճուրդի կհանի հայկական եկեղեցիների ունեցվածքը, որը պատրիարքարանի սեփականությունն է դարերով»,- իր հերթին գրել է «Ասպարեզ» պարբերականը:
«Երուսաղեմի քաղաքապետարանը մասնավորապես կբռնագրավի պատրիարքարանին պատկանող անշարժ գույքը և աճուրդի կդնի դրանք, որպեսզի գանձի ենթադրյալ վիճելի պարտքերը, որոնք երբևէ ապացուցված չեն եղել դատական գործընթացներով։ Սա քաղաքապետարանի կողմից բացահայտ փորձ է՝ խարխլելու Հայոց պատրիարքարանի գործունեությունը տնտեսական ճնշումներով՝ նպատակ ունենալով նվազեցնել նրա ներկայությունը Սուրբ Երկրում», – հայտնել են Երուսաղեմի Հայոց պատրիարքարանից։
Տեղի հայ հոգևոր այրերի պնդմամբ՝ դա կարող է բացասական ազդեցություն ունենալ Սուրբ Երկրում քրիստոնեական ընդհանուր ներկայության, ինչպես նաև տարածաշրջանում ներկայում գործող բոլոր քրիստոնեական հաստատությունների կրոնական, մշակութային, կրթական գործունեության վրա:«Երուսաղեմի քաղաքապետարանի վարքագիծն այս հարցում հատկապես անպատշաճ է, քանի որ նա նախաձեռնեց այս ագրեսիվ գործընթացը, չնայած որ քաղաքապետարանն ինքը պատրիարքարանին միլիոնավոր շեկելներ է պարտք վարձակալության ժամկետանց վճարների համար:
Այնուամենայնիվ, Պատրիարքարանը ձեռնպահ է մնացել վճարումը հարկադրելու համար իրավական միջոցներ ձեռնարկելուց և փոխարենը երկարատև բանակցություններ է վարել քաղաքապետարանի հետ՝ փորձելով կարգավորել հարցը խաղաղ ճանապարհով»,- ասված է պատրիարքարանի հայտարարության մեջ:
Նշվում է, որ հայկական եկեղեցու դեմ ուղղված այդ վարքագիծը կարող է վտանգել Հայոց պատրիարքարանի երկարամյա առաքելությունը Սուրբ Երկրում, որն ակտիվ է 7-րդ դարից։ Ավելին, դա կարող է սպառնալ հայ համայնքի շարունակական ներկայությանը Սուրբ Երկրում, որը սկիզբ է առնում 4-րդ դարից։ Պատրիարքարանը կոչ է արել Իսրայելի վարչապետ Բենիամին Նեթանյահուին, ներքին գործերի նախարար Մոշե Արբելին և կառավարական կոմիտեի ղեկավար Ցաչի Հանեգբիին վճռականորեն միջամտել և անհապաղ սառեցնել Երուսաղեմի Հայոց պատրիարքարանի դեմ քաղաքապետարանի բոլոր գործողությունները։
«Մենք նաև հորդորում ենք նրանց վերսկսել կառավարական կոմիտեի նիստերը՝ այս խնդրին բարեկամական լուծում գտնելու համար՝ բացառապես հանձնաժողովի կողմից սահմանված իրավասության շրջանակներում բանակցությունների միջոցով», – եզրափակել է պատրիարքարանը։
Հատկանշական է, որ Մերձավոր Արևելք կատարած այցի ընթացքում ԱՄՆ-ի պետքարտուղար Մարկո Ռուբիոն այցելել է Սուրբ գերեզմանի եկեղեցի և մասնակցել եկեղեցու կաթոլիկական տաղավարում մատուցված պատարագին։ Ըստ տեղեկությունների՝ Ռուբիոյին եկեղեցում դիմավորել են Հայոց պատրիարքարանի դիվանապետ, վերապատվելի Աղան Գոգչյանը և եկեղեցու նախկին հոգևորական, վերապատվելի Սամուել Աղոյանը։
«Մենք մտահոգություն հայտնեցինք Իսրայելում քրիստոնյաների ներկայության և նրանց հնարավոր հեռանալու վերաբերյալ: Պետքարտուղարը նշել է, որ շատ քրիստոնյաներ, այդ թվում՝ հայեր, արդեն լքել են Սիրիան, Լիբանանը և Մերձավոր Արևելքի այլ երկրներ, և որ ԱՄՆ-ն ամեն ինչ կանի, որպեսզի Իսրայելում քրիստոնեական ներկայությունը մնա կայուն՝ թույլ չտալով այդ երկրներում տեղի ունեցածի կրկնությունը»,- հայտնել է Գոգչյանը։
